子丹執教鞭：一定贏到口碑！
「宇宙最強」甄子丹突改戲路，放下拳頭執教鞭，率領影圈新面孔包括湯鎮業孖仔君慈及君耀等，主演以反映香港教育制度為題材的新片。由籌劃、開拍到上映，他坦言遇上問題及阻力：「片商梗係想我繼續拍《殺破狼》同《葉問》呢類電影啦，有票房保證嘛，即使我同王晶提議開呢套戲，都要先說服佢。本來我係想客串，最終『徇眾要求』愈演愈多，因為要同投資者交代。我唔可以保證票房好好，不過相信今次一定贏到口碑。」
遙控台前幕後
子丹戲裏戲外都當起老師角色：「我搵咗關家偉做導演，一班年輕演員就可以話由零開始，最多只係拍過廣告。我用自己嚟帶起台前幕後，想畀多啲機會新一代。」為了增強台前幕後的默契，百忙的他遙距離控制一切：「開拍前我叫導演安排所有演員日對夜對，培養感情，從中觀察各人特質，佢哋每個人都有條線可以發揮，佢哋嘅演出我好滿意。」
化妝：諺瞳．小白
髮型：Jacky Leung@IL Colpo