拍拖出埠玩神秘陳庭欣三重保蜜
現年30歲的前港姐冠軍陳庭欣（Toby），近日甜蜜爆燈首次高調放閃，大晒與擁逾億身家老闆級男友楊振源（Benny）的行山相，昨日兩口子在機場被撞破外遊「預支蜜月」，Toby刻意以帽、口罩及眼鏡遮樣，但依然被認出；而陸永則一家四口飛台灣吃喝玩樂！
準新人鄭嘉穎與陳凱琳婚期逼近，連日來不少傳媒在香港機場守候前往觀禮的藝人及親友，不過未捕捉到一對準新人及賓客，先捕獲一對「放閃情侶」陳庭欣和男友Benny！兩口子身穿情侶波鞋現身離境大堂，卻刻意相隔幾個身位，入閘前問到戴住眼鏡及黑色口罩的Toby去邊度玩？她只對着鏡頭揮手Bye Bye，未有回答半句；而Benny則全程低頭按手機，懶理傳媒。本月27日是Toby生日，由於要為新劇開工，所以今次與男友出埠「預支蜜月」兼慶生。
而藝人陸永則一家四口現身機場，由於他曾在劇集《殭》中與嘉穎及陳凱琳合作，莫非有份去飲？當他與家人在櫃台辦理登機手續時，有外國遊客以為他是著名音樂人，上前要求交換WeChat兼合照，令他不知所措。
陸永被當周杰倫？
其後他抵死地向記者笑說：「我同佢講我唔係著名音樂人，佢仲以為我係周杰倫呀！（去邊度玩？）去台北咋！玩一星期。（唔係去飲嘉穎同凱琳嗰餐？）唔係呀！乜有得飲咩？有得飲都唔請我？但我真係唔係去飲，係去台灣玩。」與老婆分開行的他拖着大女Hannah，Hannah對着鏡頭表情多多，一時甜笑，一時嘟嘴，又匿在爸爸身後，相當可愛！
