荷里活著名女星珍妮花安妮絲頓（Jennifer Aniston），今年2月與影星老公Justin Theroux宣布離婚，結束兩年多婚姻。最近她接受《InStyle》雜誌訪問詳談婚變一事，暗示自己不育！
現年49歲的珍妮花不滿離婚後，不斷被人批評因不想生兒育女而留不住男人，並暗示自己不育：「佢哋根本唔知我身體喺醫學上同情緒上經歷過嘅事，社會有壓力要女人做母親，如果佢哋冇做到，就會被視為缺陷。可能我喺呢個地球上嘅意義，唔係製造生命呢？可能我有其他事要去做？」
除了批評有人亂作「分手真相」外，她亦爆粗抨擊傳媒歧視女性：「女人會被人挑釁、會被比較樣貌、衣着同其他表面嘢。當有一對夫婦喺荷里活離婚，個女人就會被人奚落，傷心同孤獨，佢就係失敗。X你啦！你幾時聽過有離婚冇仔女嘅男人，會畀人話係剩男？」
另一方面，最近英國傳媒爆料指珍妮花與影星前夫畢彼特（Brad Pitt）有望合作拍新片。據知二人幾個月前已重修舊好，有知情者說：「已經回復好友關係，有電影人食住個勢搵佢哋首次合作拍戲，佢哋正慎重考慮。雖然唔係演情侶，但套戲係愛情喜劇，監製對佢哋合作都好興奮，感覺到會擦出火花。」
畢佬與珍妮花2000年結婚，5年後離婚，畢佬隨即與另一女星安祖蓮娜祖莉（Angelina Jolie）撻着並結為夫婦，直至2016年9月申請離婚。