何韻詩與助手玩完？極地看人生

何韻詩相隔年半再推出新歌《極夜後》，她承認這幾年經常進入創作失衡的情況：「好似未搵得番純粹為創作而創作嘅狀態，之前可能有各種壓力，發生好多事，但直至今年初有個感覺，好似應該要返嚟創作人同歌手身份。呢幾年自己成個生活、工作甚至個人狀態都有好多變化，希望音樂可以追得上我嘅變化。」

體悟生命循環

她表示新歌靈感是來自北極圈地方的故事：「佢哋會經歷24小時黑夜同日光，即係極夜同極晝，兩個自然現象中間嘅過渡就係嗰年嘅第一個日出，挪威年輕人有個習俗係每年行上山等第一個日出，首歌就係講極夜極晝嘅循環，生命好多好與壞嘅循環。」

工作方面，阿詩預告今年會出碟，年尾預計會舉行大型演出，說到新碟會反映這幾年的個人狀態，可有包括感情生活？她笑言：「啊，一定要兜個彎o架喎，唔知喎，總會嘅，如果要講我個人嘅話，乜都有機會涉及，但話題止於此，完！」講到她現時的感情世界，她繼續落閘說：「冇呀，唔講啦，冇人想知。」至於有傳她與助手方迦南已經分手，她避談笑言：「唔答啦唔答啦，唔畀反應啦，完！」

加拿大發掘個性

阿詩之前到台灣、加拿大等地開騷，還重返成長地加拿大的寓所，巧遇舊鄰居的剎那，令她萬分感觸：「我哋88年移民過去，直至離開都係住嗰度，嗰個鄰居係我哋去到第一個識，當時佢見我哋乜都唔識就伸出援手。」她坦言每次重回舊地總勾起很多回憶，加拿大亦對她影響深遠：「我所有反叛、唔跟規矩做嘢嘅個性都係嗰邊畀我，因為嗰邊係好自由、開放嘅社會，令我知道要發掘自己獨特嘅地方。」問她可有想過他日不再做歌手後會返回加拿大定居？她坦言：「真係未知，始終香港係我嘅家，直到呢個地方冇我嘅用處同價值時，就有機會去……但真係唔知呀，好難依家去講。」