簡淑兒仙氣變漏氣女神唔敢當
擁有一雙腰果笑眼的歌手簡淑兒，是大家心目中的「仙氣女神」，正在拍攝的劇集中也是飾演女神角色。別以為食菜咁易，原來她自認缺點多多，大頭蝦到一個點，試過遲了三天才為男友慶生，仙氣竟變了「漏氣」。
正在拍無綫劇《C9特工》的簡淑兒（Jessica），劇中演林漪娸女兒，是一位完美女神，只是她嫌這個女神太過無懈可擊：「呢個世界係冇呢個人（女神）存在，冇乜人做到，我好多缺點：大頭蝦、硬頸、唔夠小鳥依人，之前嘅男友投訴過我太獨立兼成日玩失蹤，我一做嘢就好投入，會幾個鐘頭唔睇電話，有時同朋友出去，我都唔會睇電話，覺得要尊重朋友，正如我唔鍾意朋友同我一齊時成日睇住電話一樣。」她自爆最誇張一次試過忘記當時男友的生日，遲了三天才慶祝，令對方不是味兒。
拒絕廢青追求
劇中簡淑兒被「廢青」朱敏瀚追求，現實中能否接受冇事業冇錢的男人？她說：「我接受到男仔未有事業，但接受唔到冇上進心，搵唔到錢同冇能力搵錢係兩樣嘢，窮唔緊要，窮得嚟要有上進心，我可以喺身邊支持，陪你捱過，但如果連上進心都冇，呢啲接受唔到。」
目前單身的她承認有圈外人追，可是難以發展，她說：「我嘅工作時間不定，同我拍拖要接受我同其他異性有親熱戲，呢個唔係個個男仔接受到；出街唔可以太高調，佢又會變咗半個公眾人物畀人起底。雖然圈內人可互相體諒，但我唔鍾意娛樂圈嘅男仔，覺得佢哋比較自戀。」
唱出療人效果
她坦言喜歡好脾氣的暖男，拍拖亦要過父母一關，她說：「我好緊張屋企，想父母見到我拍拖係安心，我就開心。」曾試過父母不喜歡她男友，她連帶男友見家長也不敢，早有預感會分手。她的新歌《謝謝你傷過我》是自身經歷，她說：「佢成日覺得我畀到人治療情傷嘅感覺，可能我鍾意笑，望住我就開心番，希望我唱得出治療人心嘅效果。」
髮型：Daniel Cheng @ Salon Amarone
場地：The Stadium