陸駿光陪愛犬戰勝病魔
藝人陸駿光帶同混種犬陸強妮（Curly）亮相東網巨星節目《巨星Pet Pet》，原來領養翌日，獸醫斷定牠患上狗瘟，建議安排安樂死，幸好陸駿光不忍心放棄，愛犬在「鬼門關」走了一圈，最終戰勝死神！
曾在加拿大生活的陸駿光養過牧羊犬，但當時忙於拍拖及打波，未有好好相處，回流香港後就更少機會見面，令他一直感到後悔。搬到可以養狗的屋苑後，他打算再做狗主，遂透過網絡世界物色棄養狗隻，機緣巧合下收養唐狗加拉布拉多的混種犬Curly，他說：「有個朋友住村屋，鄰居知道Curly嘅爸爸媽媽被人遺棄咗，去咗漁護署，就救咗佢爸爸媽媽返屋企，返嚟之後狗媽媽大肚，生咗八隻出嚟，Curly就係其中一隻。」
流鼻水被指患狗瘟
陸駿光收養時發覺Curly流鼻水，以為是小問題，但為安全起見，第二天立刻帶牠到動物醫院，獸醫指牠患上狗瘟，建議盡快安排安樂死，不過陸駿光半信半疑，未有答應放棄治療：「我見佢好精神，唔似重病，我同醫生講，畀我拎番去試吓，唔想咁快放棄佢！就係咁，返屋企過咗一晚，第二日瞓醒，佢精精神神望住我，完全健康，咁就一路到依家。」他慶幸當年做了一個正確決定，救了一條生命，亦因而更珍惜Curly。
陸強妮（8歲）
性別：雌性
性格：開朗，愛食同瞓
飼養年期：8年
《巨星Pet Pet》每集均有名人紅星亮相，分享飼養寵物心得，包括廖碧兒、陳婉衡及張秀文等，其他陸續登場！大家可在東網App及網頁隨時隨地收看及重溫。
https://bit.ly/2LFKryf