陳婉衡烏龍遊關西 屁股遇襲
藝人陳婉衡（Alycia）與簡淑兒（Jessica）早前一齊到日本關西旅行，展開每年一度的閨蜜遊。兩人將事前擬定的願望清單全部實現，包括着和服遊清水寺、到奈良餵鹿，並在環球片場找尋兒時回憶。
不要驚動小鹿
Alycia之前看過關於遊客在奈良餵鹿時被鹿咬傷及攻擊的報道，所以她們餵鹿時都小心翼翼，然而小鹿比她們想像中乖巧：「我哋有行埋去同啲鹿影相，但要放輕腳步，唔好驚動佢哋，加上我有用食物收買佢哋，所以佢哋好定咁坐喺我隔籬影相。不過我將啲鹿餅放咗喺褲嘅後袋，可能佢哋聞到味，所以就用頭頂咗我個屁股幾下。」
着和服被集郵
穿上和服在京都的街頭與神社穿梭是遊客的指定動作，兩人還帶了多部相機拍照，Alycia說：「Jessica帶咗一部360相機、一部美圖相機，我就帶咗大機同腳架，加埋手機，每日返到酒店就係揀相，晚晚都好夜瞓，哈哈！」二人化身日本娃娃，沿途被不少遊人邀請合照，她笑言：「我哋好似變咗米奇老鼠咁，好受歡迎，我哋講笑話應該要收錢合照，可以幫補番啲旅費。」Alycia期望每到一個國家旅行，都可以穿上當地傳統服拍照紀念。
美少女難忍手
卡通片《美少女戰士》是Alycia的兒時回憶，當得知環球片場推出《美少女戰士》的主題遊戲，即時加入重點行程：「我細細個就睇《美少女戰士》，當時好鍾意禮服蒙面俠o架，今次去到現場真係好開心，雖然去之前話唔會買嘢，但見到啲精品好靚，真係忍唔住手囉！」
隨意食行到瘦
今次關西之旅，兩人採取行到邊食到邊的策略，沒有刻意訪尋名店，唯一事前做了資料搜集的食店就是蛋黃哥的主題餐廳，因是Jessica的至愛。Alycia稱之前預計今次是增肥之旅，結果卻瘦了回來：「雖然每日食好多嘢，但都行好多路，每日行成二萬幾步，真係好攰，我同Jessica喺日本已經約定返到香港要一齊去按摩喇！」
一貧如洗崩潰
玩樂背後卻是烏龍百出，二人試過搭錯對頭車、去錯城市、錯過航班，Alycia說：「我冇為意大阪有兩個機場，去錯咗另一個，搞到搭唔到班飛機，真係好崩潰，我哋仲要用晒啲錢，得番100日圓，好在可以碌卡。原本可以補錢轉搭同一間航空公司嘅另一班機，但我要趕住返香港做嘢，時間唔啱，所以就幫襯另一間航空公司，Jessica捱義氣陪我一齊搭。」不過，相信這些烏龍事會成為日後美好回憶，兩人已約定下次到北歐看北極光。