余香凝飛常時期逃離是非地
藝人余香凝早前與拍拖3年多的陳家樂分手，專心寄情工作。事業發展順利的她，不但有多部電影在手，更可飛往不同地方開工，暫離是非之地，難怪她笑言今年是「出埠年」，成為「空中飛凝」。
既是演員又是歌手的余香凝（Jennifer），自從被爆與陳家樂分手後，負面新聞不絕，不過身為工作狂的她一於懶理，飛到日本、馬來西亞、台北和紐約工作，她直言樂在其中：「之前冇試過出外做嘢，但今年突然有好多機會飛，所以自己都希望可以飛到較遠地方工作，好似紐約我未去過，今次有機會去都好開心，皆因平時去旅行都係去東南亞嘅地方。」
以為鎮宇好惡
作為影壇新星的Jennifer，電影工作接踵而來。早前她與前輩吳鎮宇合作拍攝電影，又驚又喜：「拍攝時日曬雨淋，加上鎮宇又病咗，所以好驚當時會NG影響進度。記得有一場戲我要鬧佢，雖然個心好驚，但都做好自己本分，點知一Cut機，鎮宇就好搞笑話：『只係咁咋，以為會好惡添！』」她又稱雖然沒有請教對方演戲心得，但經常從旁偷師，獲益良多。
作歌鼓勵朋友
除了忙拍電影外，Jennifer早前親自作曲的《黑暗之外》，以過來人身份憑歌寄意鼓勵患抑鬱症的好友：「我今次唔想再出情歌，希望自己隻歌可以鼓勵到人，今次我特別想送畀一個患上抑鬱症嘅好友，因為佢感情出現問題而患病，由一個偏肥嘅女仔突然瘦咗20kg，令我非常擔心。」她又透露當年經歷低谷時，慶幸沒有放棄，才會成就今日的自己，可以用歌曲發放正能量。
服裝：mo&co edition
場地：Flex studio