李紫彤異性緣旺盛內衣冇得剩
歌手李紫彤（Crystal）趁夏日大解放，穿上比堅尼大晒身材。Crystal天生擁有異性緣，逢到沙灘必被搭訕，又曾成為內衣賊的目標。雖有異性緣，可惜總是遇人不淑，幸她吸取教訓，現已成為戀愛高手。
李紫彤身材嬌小，但擁有33B、24、36養眼三圍，穿起比堅尼時玲瓏浮凸，她自言天生纖瘦，不易發胖，從來不用刻意節食。Crystal擅長游泳，讀書時是學校泳隊，不時會到沙灘暢泳，每次總惹來異性搭訕，手法層出不窮：「試過有人用手機影咗我相，話要Send番畀我，問我攞電話，我話唔使喇，張相送畀你；又會以打沙灘波名義叫我一齊玩。」除了不時遇上不速之客，住村屋的她早前更慘被偷取褻衣及比堅尼，要報警求助，她稱最後警方已將小偷繩之於法，而她亦在屋外加上圍欄，以保不失。
出寫真被騙財
另外，Crystal透露將推出處女寫真集，講到性感尺度，她表示比堅尼已是極限：「我唔想太性感，不過今次贊助出寫真嘅影樓老闆娘就鍾意藝術性感，睇吓點樣可以攞個平衡點。」她又自爆曾因推出寫真而被騙財：「我嘅前經理人話幫我出寫真，我畀咗三萬蚊，仲影咗幾輯相，但最後係不了了之。」她稱今次是音樂寫真集，會配合其新歌《忘記愛情》的主題推出，由她親自作曲填詞：「首歌係我親身經歷。有個拍咗好耐拖嘅男友，分手後竟然問我攞番電話費，又話家姐賣翻版畀人拉咗，問我攞錢。」
揀男友睇棚牙
問到是否經常遇「渣男」騙財？Crystal稱只此一次，後來就學精了，更成為戀愛高手：「我依家學識點分渣男，對男人唔好隨傳隨到，唔可以太在意對方，畀佢咁快追到手。我揀男友有兩個條件，棚牙要乾淨，同埋約會時要有男士風度，唔可以乜都AA制，當然拍拖後我唔介意請佢食飯，但追求階段就唔得計得咁清楚，呢個唔係錢問題，係態度問題。」