林夏薇漏口峯讚「阿嫂」靚女

晒長腿的林夏薇，即場試玩潮點。

藝人林夏薇昨日現身apm數碼運動潮人學堂，與新鴻基地產（中國）執行董事馮秀炎一同試玩五個潮點。昨日是林夏薇約滿無綫後首次工作，她透露是公司之前為她接下的，對於自由身有點不習慣並表示掛住公司。提到林峯身在外地拍戲，問有否見過其新女友張馨月？她竟口快快說：「有！」自知說漏了嘴時卻愈兜愈亂，非常搞笑，她說：「你講緋聞女友就知，新女友就唔知，聚會見過一、兩次。（已經融入咗家庭聚會？）咁又唔係太多聚會，我又忙，同老公飛嚟飛去。（你咁忙都見過兩次？）最緊要相處，好多嘢由相處開始。（覺得佢點？）冇任何覺得點，唔多見面，會傾吓偈。（靚唔靚？）靚。（同林峯襯唔襯？）問番林峯。」

• 新鴻基地產（中國）執行董事馮秀炎與林夏薇合照留念。

跟老公返工 由低做起

另外，她透露近日跟老公莫贊生學投資，暫時不會拍劇：「我會由低做起，難得跟到咁好嘅師傅。（老公親自教？）係，跟佢返工。（工資會唔會喺家用扣番？）唔關事，志在學嘢。」並透露自己的飲食生意會開分店外，亦會有其他新投資項目，非常忙碌。早前與老公撐枱腳慶祝結婚3周年紀念，並於社交網甫相放閃的她，指一頓浪漫晚飯勝過收禮物，談到造人大計，她坦言正看中醫調理身體，因早前撞車傷及頸椎，不能做劇烈運動，需要慢慢鍛煉肌肉，又嫌自己太瘦，故要多吃多休息。