現年25歲的美國人氣歌手Miley Cyrus上周突然刪除Instagram所有照片，被外界猜測她與28歲澳洲男星里安漢斯禾夫（Liam Hemsworth）情變，日前更爆出女方未玩夠，狠心取消婚約，令一直相信女友、恨成家立室做老竇的里安自認戇居仔！
Miley與「雷神」基斯漢斯禾夫（Chris Hemsworth）細佬里安離合拖拉長達9年，近日驚爆「埋門」玩完！知情者透露：「里安想要細路，唔想一路推遲婚禮，但呢個唔係Miley心目中嘅計劃，佢依家心都碎晒！Miley一路推遲婚禮，里安已經好厭倦。佢哋最近幾個月都相處唔到，個女仔根本唔想結婚，呢樣嘢大家其實都知，除咗里安，佢家人求佢認清個事實，但佢一路相信Miley，依家佢咪覺得自己係戇居仔囉！」
Miley去年曾於訪問中表示沒將婚姻放在首位，並講明婚前仍有很多事想做。近月未見二人合體外出，里安對上一次於Instagram上載拍拖照，已是3月的事。
二人於2009年拍戲撻着，3年後宣布訂婚，不過翌年分手，當時Miley由清純玉女歌手變不文女，狂賣肉又被爆吸毒。至2016年，二人復合並再訂婚，女方即時「從良」，可惜戀情仍未能開花結果。
另邊廂，里安哥哥「雷神」基斯愛情美滿，近日他與結婚8年的老婆Elsa Pataky去西班牙度假，慶祝女方42歲生日。他於社交網狂放「閃光彈」，大晒夫婦跳舞的影片，見「雷神嫂」被High爆的老公狂舞。難得撇下三子女過二人世界的Elsa，亦有分享與老公咀嘴相，Sweet到漏！