陳友無悔拆散溫拿唔想阻人發達
由陳友、譚詠麟（阿倫）、鍾鎮濤（阿B）、葉智強、彭健新組成的「溫拿樂隊」，於七十年代風靡不少粉絲，及至七十年代末卻各自發展，陳友早前接受訪問，自爆當年是他決定分開發展：「仲記得當日啱啱去電台做完節目，大家喺草地上面傾偈，我同大家商量，不如試吓各有各發展啦，其實之前我已經同彭健新、葉智強講過，佢哋都話OK，所以嗰日就講出嚟！」
作此決定的原因，是他想隊友發展得更好：「我哋1973年成立，一路都向上發展得幾好，直到1978年我哋好似谷到上一個平位，冇再向上，當時阿倫同阿B都好多人搵，佢哋可以繼續上，咁不如唔好拉住佢哋，又或者我哋可以有第二樣嘢係得嘅呢！」
難兄難弟冇交嗌
陳友坦誠地表示各行各路後，自己的路途確變得很艱苦：「一方面我好戥佢哋開心（指阿倫、阿B愈做愈好），自己就麻麻地，另外兩個（彭健新、葉智強）就話我點解嗰時講埋啲咁嘅嘢（指各有各發展），不過，點都好，咬緊牙關就得。（拍檔咁耐有冇嗌過大交？）真係咁耐都冇，只係我寸吓你，你寸吓我咁，好奇怪，從來冇乜點拗過。」
早前他執導電影《兄弟班》，就是用溫拿年輕時的故事作藍本，戲中講到眾人因發展各異而待遇不同，陳友笑言：「咁當然紅嘅會酒店房大間啲，保鏢又多啲，呢啲好合理。（當時有冇酸溜溜？）冇喎，因為我哋會兜亂嚟住，我哋冇計較呢啲嘢。」
場地：1563 At The East Live House and Restaurant