林泳淘鄧以婷 享受Cosplay做機迷

「無綫咪神」林泳淘（Wingto）第三度為動漫電玩節擔任大使，昨日她與鄧以婷、王卓淇、李君妍、楊嘉欣、尹詩沛與何依婷八位靚女以Cosplay造型組成「Godlike Girls」電競隊，以大使身份到九龍塘宣傳「2018第二十屆香港動漫電玩節記者會」，造型青春可人。

打機打到天光

Wingto指今年是成員最多的一次，大讚各人都着得好靚，她承認享受Cosplay：「因為平時生活上着唔到咁多唔同嘅衫。」鄧以婷開心抽中最愛的紫色，表現雀躍，問能否接受更性感的服裝？她笑說：「難啲喎，因為好多性感角色都Hit爆，身材又好勁，凡人係接受唔到呢啲挑戰！不過我都想扮『不知火舞』，因為係我打手機Game最鍾意嘅角色。」

問到是否愛打手機遊戲？鄧以婷笑言手邊有幾隻遊戲已是「基本」：「好幾隻Hit Game我都有玩，我哋都經常喺big big channel直播打機。（打機叻？）啲網友都好勁，我哋試過同電競選手打，五五波啦！」又指爭勝心好大，為了贏一場可以打足幾個鐘！Wingto亦直認是機迷：「試過6、7點諗住打一陣，打打吓已經凌晨4點，打天光！」

同男仔網上約戰

問到有否男士以打機為由借故親近？鄧以婷說：「都係網友喺社交平台約，好多時會一齊打嘅。（約過出嚟？）都係上網一齊打，啲網友好Nice，會教打機仲畀埋資料我參考。（男士咁體貼會加分？）都會。（怕另一半因打機冷落你？）驚係我掛住打唔理佢多啲！」