古天樂洗底黑變白

古天樂和谷祖琳昨日在尖沙咀出席《ALBION皇牌健康水 有機美肌活動》，一向膚色黑黝黝的古仔，現場見他皮膚已減黑，他說：「咁啱新戲要演裁縫角色，導演要我膚色白啲，盡量，控制唔到，要靠化妝打燈。（唔慣膚色白？）唔會，不過夏天想出去曬太陽，但近排天氣麻麻，同陽光冇乜緣分。（覺得自己膚色黑定白好睇？）我鍾意黑，因為唔鍾意化妝，黑可以化少啲妝。」

低調行善開影院

昨晚以他命名的電影院開幕，但事先張揚不會出席：「我要拍嘢。（去唔到好可惜？）我比較低調，主要想推動本地電影，有工作未能出席。（捐咗幾多錢？）我比較低調。（遲啲會唔會有一系列古天樂命名？）將來嘅事將來先講，我比較低調。」對於近日深夜重播其舊作《刑事偵緝檔案IV》，惹來網民評論他劇中的普通話，並指現在比以前有進步，他沒有重看，認為人不可以重拍。

小谷在台上用有機北之薏仁炮製凍飲，最後步驟竟叫古仔在甜品上插旗裝飾，古仔講有味笑話，笑說：「插旗！」穿低胸裙的小谷透露刻意曬黑襯番對方，惟曬過龍致脫皮，又透露細女髮型跟她一模一樣，儼如母女裝。

谷祖琳專心炮製甜品，叫古天樂幫手。	周奕瑋密密拍旅遊節目，寓工作於娛樂。	胡子彤期待新作首映，會叫女友捧場。

周奕瑋惡補演技

現場擔任司儀的藝人周奕瑋，以為自己貪靚，但入行後才知有更多男仔十分姿整，他透露第二輯旅遊節目落實年底出街，將會去日本放假順道搵料，提到早前拍Big Big channel試美食片後，發覺自己的演技需要進修，他說：「我中學、大學時有做Drama，但畢業後演技畀番晒學校。」

此外，藝人胡子彤昨晚出席「古天樂電影院命名儀式」，該電影院將播映新進導演以及以前受歡迎的作品，他有份演的《逆流大叔》亦將在該影院播放，之後會播姜皓文的《翠絲》等，胡子彤坦言很興奮：「希望首映都可以喺呢度搞，會係一件好鼓舞嘅事。（首映會唔會叫女友歐鎧淳嚟支持？）會，但屋企人先，最緊要有飛，不過，愈少飛愈好，即證明反應好。」