「美版松岡」丁子田專心戰港姐狠撇5年男友

候選港姐經大會「改頭換面」執正後，昨日在將軍澳一間酒店正式見傳媒，「索女一族」要數(7)丁子田、(14)何泳芍、(17)陳曉華、(19)楊帆及(20)鄧卓殷，當中「美版松岡」丁子田（Sara）近日新聞多多，被爆是「富二代」，家人又與圈中人熟稔，可謂贏在起跑線，她昨日狀態甚佳，未受報道影響。在美國長大的她，自爆返港前與男友Mark分手：「我哋係和平分手，大學開始拍拖5年，中間都有分開過。結束5年情當然可惜，但Long distance（遙距戀愛）真係唔得，大家有共識先喺事業上努力。」

Hera戒零食減肥

至於「仙氣紅姑」陳曉華（Hera）面對傳媒淡定大方，她笑說：「心情都緊張，要慢慢適應，我一緊張就會食零食，但要減肥，開始要戒口。」曾與歌手狄以達拍拖的她坦言已是過去式，不認為對參選有幫助，亦不擔心再被爆情史。

而一身古銅色肌膚的何泳芍（Honey）雖打扮密實，仍難掩豐滿身材，她笑說：「參選係想改變大家對健康膚色嘅睇法，滿意自己膚色，唔使再曬黑。」

何泳芍（右）與黎智肌膚一黑一白相映成趣。	楊帆化上濃妝，仙氣大減。	梁致欣（左起）、李明芙、高育英與鄧卓殷身材的骰，靠靚樣及笑容搶分。

鄧卓殷身高蝕底

佳麗中有多位「的骰姑娘」，包括(3)梁致欣、(11)李明芙、(18)高育英及鄧卓殷，當中以鄧卓殷最省鏡，屬見習建築師的她說：「我只係得1米60，企埋啲1米70嘅佳麗身邊顯得好矮，身高冇得改變，惟有靠甜美笑容，希望大家睇到我開朗嘅性格。」而「國產金喜善」(1)蘭倚婷樣貌不俗，但廣東話最差，在台上介紹自己是「嚴重顧問（形象顧問）」，她賣口乖指會多看無綫劇惡補。

「仙氣紅姑」陳曉華身材瘦削，但仍打算減肥。

20位佳麗昨日以斯文打扮見傳媒。