余德丞「飛魚」過塘變小生

藝人余德丞入行前是出名的游泳健將，早前憑42吋胸肌打響知名度。談到運動員生涯，他坦言：「我由小學二年班開始練水，起初唔係咁積極，但去到四年班要代表學校比賽，因為跨組別，我只係做後備，就係咁令我要決心練水，呢啲就係所謂嘅鬥心。」游泳令他整個求學時期，都在團隊生活中度過：「試過同隊友一齊去泰國受訓，我達唔到教練要求嘅時間，佢話如果我再做唔到，全隊人周末要留低陪我一齊練水。隊友好好，每朝早起陪我受訓，結果我達標，可以全隊人去玩。」