Jessica@SG偽台妹打卡掃美食
組合Super Girls成員蔡明思（Jessica）很喜歡台灣這個地方，已到過當地旅遊多次的她，早前寓工作於娛樂，趁空檔四圍遊。被形容為台灣美食百科全書的她，甫落機即第一時間拖住行李去開餐。今次又特別走到陽明山火山區遊覽，最難忘是在對的時間欣賞到最愛的繡球花，眼前一片花海，目不暇給。
陽明山賞花
對繡球花情有獨鍾的Jessica，過去多次到訪台灣，都想去欣賞：「但次次時間都唔啱，一係去到未開，一係就已經凋謝，因為繡球花開花嘅季節得三個星期到一個月時間，今次搭咗一個鐘頭車上陽明山國家公園，終於睇到繡球花，雖然唔係最盛放時候，但望到一片花海，嗰種震撼感係好難忘。」
Jessica指旅客上到陽明山，大多往欣賞繡球花、浸溫泉，但好少旅客會特登搭車上到頂點，由於該處是火山口，故她一落車就已經聞到好大陣硫磺味。
夜市食唔停
Jessica幾乎每次到台北都會去饒河街夜市掃街：「雖然呢個夜市唔係好大，但我鍾意食嘅排骨湯、臭豆腐、胡椒餅都有齊晒。」不過今次食唔到鹽酥雞，因為太夜去到，檔口已關門，令她有點遺憾。而Jessica本身說得一口流利國語，所以去「掃街」時，很多人都以為她是正宗台妹，非常搞笑。
隱世小店嘗地道風味
Jessica大讚台灣是個好好的旅遊地方：「有時得兩、三日假，飛遠啲又唔夠時間玩，台灣就係我最佳之選，吃喝玩樂充吓電。」若想嘗台灣最地道的風味，就要深入住宅區搵：「呢間小店喺住宅區一啲巷仔入面，佢啲排骨好酥、好Juicy，個湯冇味精，佢啲小菜都好出色，有個酸酸甜甜的大腸小食好惹味，佢嘅炒通菜、豬耳都好好味。」
必食仙草芋圓炸鹹蛋黃
每次到台灣Jessica必定會幫襯「燒仙草」：「大家一定要試，用仙草做嘅沙冰，加埋自家製芋圓，簡直食唔停口。」她自言像代言人，不斷介紹好友去台灣試食：「其實世界各地都有分店，不過都係台灣最好食，臨上機都要去食多轉先捨得。」此外，台北夜市乃旅客朝聖之地，這檔小食好得意，是原粒鹹蛋黃夾酥餅，然後再炸到金黃色：「超邪惡嘅食物。」