陸浩明𥄫實索女友廁所位護駕

Ayan樣靚身材正，做佢男友梗係要睇到實，以免惹來狂蜂浪蝶。

近年愛情事業兩得意的陸浩明（6號），與肥媽主持無綫節目《食平D》系列，獲帶挈不少商演機會密密搵真銀，加上與拍拖多年的女友Ayan感情穩定，兩人已積極儲錢「上車」結婚。向來Sweet的兩人，日前又拍拖現身中環，相約數名友人歎茶。

心心眼眉目傳情

當日下午約5時，6號與女友急急腳步往餐廳，會合早已在場的友人。席上，6號還變身「阿四」，見他頻頻為女友遞上食物及飲品，然後再「G4」上身！對女友錫到燶的他見Ayan要往洗手間，依然寸步不離，貼身護駕到商場的洗手間後，便於門外邊撳電話邊呆等女友。之後，兩人手拖手返餐廳，發現記者在場即笑笑口打招呼，問到陪出陪入如此緊張是否好事近，6號即大派定心丸：「放心啦！有好消息我會好高調咁同大家宣布。」女友聞言即冧爆甜笑。

兩人返回座位與友人邊食邊傾，期間Ayan露出一副冧樣，托着腮望實男友甜甜笑，眉目傳情放晒閃，完全當同枱友人透明！一行人最終逗留個多小時才離開，6號與女友繼續於商場行街過二人世界。

陸浩明全程斟茶遞水，睇女友Ayan個樣就知有幾冧！	被發現陪女友去廁所，陸浩明個樣勁尷尬。	Ayan、陸浩明
陪女都要抖吓氣，陸浩明趁落扶手電梯時撳電話。