陳倩揚8磅千金等埋爸爸先出世！

囝囝扭計要跟去醫院，倩揚惟有死忍陣痛講故事氹瞓覺。

已育有兩子陳羲廷及陳羲穎的前港姐陳倩揚，昨日順產誕下8磅千金，今次雖然是她第三次懷孕，但仍有點緊張，還笑言早有預感女兒會在這幾天出世：「因為醫生話我今胎非常足磅，但早幾日老公同大仔去參加交流活動，所以都要請媽咪喺屋企陪我，同埋要拜託經理人隨時留意電話，一有任何作動情況，可能要立即支援。」

• 雖然已是第三胎順產，但倩揚指痛楚屬「最高級別」。

老公日本趕返港

她笑言不時叮囑肚中的小寶寶，要等爸爸7月9日晚由日本回港後才出世：「佢真係好聽話，等爸爸返嚟仲可以抖一日先出世，生產前一晚，我感覺到作動，即刻洗頭沖涼，仲忍痛講埋古仔氹兩個仔瞓先去醫院。因為細佬比較黐媽咪，仲話要跟埋去醫院，要花啲時間說服佢，先能夠出門口。」

生產過程雖然順利，但倩揚直言今次痛楚是「最高級別」：「嗰種痛真係唔識形容，痛到有一刻想暈，超越晒前兩次，好彩過程唔長，同埋有一班好好嘅醫護人員同老公幫我打氣，成個過程都算順暢。當妹妹出世，醫生將佢放喺我心口時，嗰種暖意同重量，令我覺得好感動。」羲廷、羲穎得知妹妹出世均十分雀躍，還嚷着要快些見妹妹，倩揚亦笑言想影一張全家福作留念。