譚杏藍人肉速遞氹男友開心

譚杏藍（小花）由KOL回復歌手身份，先後推出《Hey Hey講到邊》及《傻大姐》兩首歌曲，她坦言感謝男友（ToNick樂隊主音趙善恆）推動：「佢最大幫忙就係畀信心我，呢樣係錢都買唔到。」小花指二人的相處十分簡單，最愛就是打邊爐，亦甚少慶祝節日，話雖如此，恆仔今年生日她還是忍不住送上驚喜：「當時我喺日本做嘢，突然諗到佢孤伶伶返屋企好似好可憐，就去咗買機票飛返嚟。」這條驚喜片段閃爆網友，而小花就認為男友開心就夠：「到第日我哋都冇慶祝，兩個人好舒服咁過咗一日，睇吓風景咁。（有冇送禮物？）張機票係啦！大家就係大家最好嘅禮物，講完呢句都怕醜！」