江若琳恨被「老竇」掟落街

江若琳對劇集《大時代》非常着迷，自爆翻睇過三次。

鄭少秋、陶大宇及江若琳（Elanne）等，昨日到堅尼地城為ViuTV新劇《詭探前傳》開鏡拜神，秋官與大宇繼20多年前的《大時代》後再合作，「蟹仔」大宇勁讚「老竇」：「我頭先摸過佢，零脂肪！」首次接觸靈異片種的二人要在劇中爭收徒弟，秋官笑說：「丁蟹個仔仲係叫『o靚』，原來依家係大哥。」

大玩掩面甫士

二人表示現場有玄學師傅，因此不擔心遇上怪事。至於可想《詭探》主角邵仲衡客串前傳？二人都覺得是好事，大宇又笑言：「雖然佢個人唔喺度，但精神永遠存在。」問到再合作是否仍默契十足？大宇即自爆當年幾隻「蟹仔」很曳：「『老竇』對白多，角色要處理嘅又多，但佢冇勞氣，叫我哋玩還玩，畀番尾句佢接到就得啦。」儀式後，游學修、麥子樂及陳安立與兩位男主角合照，陳安立與麥子樂更重現大宇在劇集《心花放》中的經典掩面甫士，非常搞笑！

由頭憎到尾

而飾演秋官女兒的Elanne，被問到可會被對方掟落街？她笑言：「我都想！我係《大時代》嘅超級粉絲，頭先見到大宇叫秋官做老竇，我就覺得自己睇緊《大時代》。」她自言心情緊張，因為兩父女在劇中並不融洽：「我要由頭到尾都好憎佢，好難演。」她直認有壓力，要多做功課，但覺得演酒廊歌手很好玩，又會叫未婚夫蕭潤邦陪自己練歌。另外，新人劉沛蘅飾演一名被迫冥婚的女子，坦言遇上前輩非常興奮。

大宇攬實「老竇」秋官，大讚對方零脂肪！	劉沛蘅	陳安立（左）和麥子樂擺出大宇的經典掩面甫士，相當搞笑。