爆菊梓喬一飯之怨吳若希：芥蒂好深！

吳若希踢爆菊梓喬仲未請食飯，成為心中一根刺。

早前有指吳若希（Jinny）因停工生仔而在「星夢」失勢，為挽狂瀾而（抓）撈無綫綜藝節目，更甘願在劇集中做大配角，她自認是（抓）撈之人：「係我主動問老闆有冇劇畀我拍，但係要唔多戲份，做綜藝節目就係為開心。」她又稱與菊梓喬（Hana）只是良性競爭，雖然全晚只得一獎但已滿足：「因為我得一首歌派台，同老闆講過一年做一首起兩首止，希望有多少少時間陪家人。（一姐地位不保？ ）我公司冇一姐，但愈來愈多新人，我都要勤力工作。」

不過，Jinny被問到與Hana的關係，她坦承不熟，見到面會傾偈。至於會否擔心是非而令兩人有芥蒂？她笑說：「佢加入公司已經有芥蒂！因為新人要請舊人食飯，係不明文規定，但佢到依家都未請我食飯，我要同佢傾傾，芥蒂好深，餓親我個肚點算。」

菊梓喬	吳若希與菊梓喬各自企在老闆身旁，平起平坐！	軒仔連奪兩歌曲獎，可喜可賀。

• 許靖韻露膊上陣，青春滿分。

軒仔指祖兒「被愛中」

同場的張敬軒憑歌曲《缺》及《天才兒童1985》獲歌曲獎，提到早前與蘇永康及容祖兒到東京看演唱會，問祖兒是否療情傷？他說：「我唔覺得！我同佢一齊『相睇』，即係相約睇演唱會，佢狀態幾好。（有冇八卦佢係咪同劉浩龍復合？）唔會刻意問，佢開心就得。（同你講感情事？ ）想講就講。佢依家工作為重。（因為冇其他，只有工作？）唔係，佢依家幾開心。（唔覺佢失戀？）係囉！佢係被愛嘅狀態，有家人、朋友及深愛佢嘅人。（多咗搵你陪？）冇，佢本身好獨立，見佢好容光煥發。」