藝人唐詩詠昨日穿上吊帶裙出席烘焙活動，在台上自爆曾整朱古力蛋糕「冧仔」，可惜不成功。受訪時重提「失敗」往事，她憶述當年上網學整蛋糕：「睇啲唔睇啲，搞到朱古力燶晒，但第二日就要送，最後買咗個現成，隔水溶咗佢，再倒落模度。」
她自認最拿手煲湯，又想學煮中菜，但笑說最希望男友為她下廚：「所以想搵個識煮嘢食嘅男朋友，成日都同阿田（田蕊妮）講，好羨慕佢老公（杜汶澤）識煮咁多，同埋我又鍾意留喺屋企，可以玩煮飯仔。（叫佢介紹男仔畀你？）佢識煮但又未必識呢類男仔。」
