陳煒最強後台撐腰 拚死爭視后

現年44歲的陳煒今年力作不少，包括擔正女一的《果欄中的江湖大嫂》和熱播中的《宮心計2深宮計》，均是收視和口碑俱佳的劇集，令她很大機會在年底的頒獎禮中「起雙飛」獲提名「最佳女主角」，加上亞視出身的她，一直努力演出不同類型角色，當年的亞視高層李寶安（現任無綫行政總裁）已知她非池中物，如今在無綫再度遇上，眼見其演技脫胎換骨，將「太平公主」的霸氣演得活靈活現，認定她在無綫的女一位置，故視后贏面甚高。

鵪鶉發惡嚇親人

之前曾兩度提名視后的煒哥，日前接受專訪時亦當仁不讓，覺得自己是實力派：「角色令觀眾同網民都咁鍾意當然開心，不過依家都係上半年啫，講到信心，必須要畀自己嘅，有係錦上添花。（你都提名過兩次喎？）係呀，我係有實力o架！（同劇王后胡定欣一齊爭？）我哋惺惺相惜！（有冇假想敵？）其實好鍾意內地演員潘虹，04年同佢拍過內地劇《大清後宮》，佢嘅氣度同量度都一流，我個『太平公主』角色係參考佢嘅氣度o架，今次可以爆發出嚟，都係對方畀我嘅啟發。」

陳煒將手段毒辣的太平公主，活靈活現呈現觀眾眼前。	陳煒獲不少市民邀合照，她也一一滿足要求。	偷得浮生，陳煒日前行街掃波鞋。

煒哥飾演的太平公主，做了不少害人壞事，最終角色亦不得好死，因犯下叛國罪而被賜白綾自盡，與歷史相像。談到這場吊頸戲，她笑指好Easy：「只係用咗兩個鐘嚟拍，因為係吊威吔拍嘅，我唔需要做任何動作，好簡單，亦都可以話死得好痛快！」

其霸氣演繹，深得觀眾欣賞，其實煒哥背後下了不少苦功，才成就今次的開竅演出：「我讀書唔多，所以拍之前睇咗好多歷史書籍，米雪姐教我，想好只有背熟台詞，唔係十次八次，係七、八十次喎，所以我犧牲瞓覺時間，試過頭髻冇拆兩日，好彩冇生嘢！至於運用聲線，要用丹田，劇中咁多唱家班，馬浚偉、呂珊、謝雪心等都畀好多意見我，我平時講嘢氣若游絲，又唔會發脾氣，好似鵪鶉咁，所以今次咁爆都嚇親人，出街見到觀眾都話怕咗我，哈哈！」

市民爭住「集郵」

此外，煒哥日前偷得浮生，與助手一齊行街Shopping，掃波鞋兼買日用品。當她去餐廳食飯時，更獲不少市民邀合照「集郵」，她亦開心地逐一滿足粉絲，甚受歡迎。