高海寧傷後腦慘變鬥雞眼
高海寧於新劇化身特工，本應身手敏捷，卻自爆於拍攝期間「老貓燒鬚」，疑失平衡「監生」撻落地，傷及後腦和盆骨，事後眼部更出現後遺症，很易變成鬥雞眼！
馬國明及高海寧（高Ling）為劇集《C9特工》，日前以「夫妻檔」到南生圍影婚紗照，身穿禮服的馬國明抵抗烈日高溫，全程面不改容，笑話為拍攝都要頂硬上！
帶傷上陣的高Ling則穿入膊婚紗露香肩，她憶述受傷經過時仍猶有餘悸：「當時係喺街市拍緊，塊滑板上面有兩個菜籮，自己兩隻腳都企咗入去，一拉條繩向前行就失平衡撻落地下，都要抖一抖先起到身。」她隨即入院檢查後腦及盆骨 傷勢，包括照腦掃描及X光，幸好醫生指沒有大礙。
望嘢有重影
問到後腦撞傷位置已消腫？她表示需時康復，不過再自爆有後遺症：「會再覆診照磁力共振，主要係對眼容易鬥雞，向右望又會有重影，醫生話可能係撞擊影響到入面啲神經線，依家唔係好控制到眼肌，慢慢會好番。」她揚言不會因此而錫身拍攝，認為今次只是意外，希望之後都可親身上陣。高Ling又慘爆話受傷後原本想致電媽媽撒吓嬌，但竟大失所望：「細佬早前去咗日本旅行，我喺白車打唔到畀媽咪，原來佢同爸爸臨時買機票飛去日本搵細佬，受咗傷都冇人陪，好失落！」
馬國明錫住
身旁的馬國明無奈指事發時不在場，對方受傷後才趕到：「好擔心，有上十字車睇一睇佢，都有叫佢休息多日嘅，但佢話冇所謂繼續拍，好專業！」他直言之後拍攝會錫住高Ling：「佢仲有好多打戲，我就後段先有多啲。（怕唔怕女友黃心穎擔心？）唔驚，今次啲打戲係輕鬆、搞笑為主，冇太大挑戰。」
