陳庭欣任砌爛做冇Say No！

邊個撚雀最耍家？我Nuts哥梗係推介陳庭欣，「撚雀神功」冇花假，多年臨床實證，撚得掂屋企三隻鸚鵡，撚到要幫隻雀吹生日蠟燭、得閒又玩雀仔按摩（堅o架！真係同隻鸚鵡按摩！）又話上埋床講秘密，人雀交融，這世界變得很美呀！加埋天生奴性重，入行八年肯捱肯做冇Say No，抵佢釣到金龜，撻着身家過億嘅美容王國掌舵人。

「食燈籠玩月餅」

有幾抵釣？女星同富商拉埋一齊，大家就會諗好多嘢，以為升呢做「金絲雀」嘅陳庭欣乜都唔使做，單憑蜜桃胸就可以有飯開？自爆有人出到飯局價200萬嘅佢，如果真係咁拜金，使乜拍劇除衫犧牲色相，又要打鑊甘一個打十個？不如「有米男友一個接十個啦」！夠膽講句，歷屆港姐冠軍最襟撈爛做只得佢！《都市閒情》？有！《東張西望》？有！《歡樂滿東華》做埋卡拉之星？都有！莫講話美食、財經、風水、扮靚節目，去到龍舟競賽、煙花匯演甚至明珠台講「雞腸」，一樣冇難度，有年仲衝出香港，做埋倫敦奧運主持呀！全台乜騷都做晒咁滯，因為口技了得，一句「食燈籠玩月餅」即搶fo成為本土金句，仲講「中秋節快樂」？Out啦！真係紅都面晒呀！

話晒浸過鹹水、喺英國名校曼徹斯特大學畢業，真係Very Good，少少鹹，卜卜脆，任何場合都要佢！食腦又識做，每年無綫玩Amazing Summer，姐仔花旦大解放，佢係蜜桃胸代言人梗係插旗，唔會畀班網民「胸虛」！拍劇花生指數直逼女一，人做佢唔做，至爆仆去做！畀張兆輝掃胸、扮跨性別人士半裸上陣，近排《宮心計2》證明佢堅抵諗，一出場就爛面，仲要同自己埋單上吊自盡，一集玩完！靚？咩嚟o架？

「一秒強姦」搞大龍鳳

喺《致命復活》打個喊路就Miss咗嘅「一秒強姦」都夠爆啦！佢自己都話效應大到去買雲吞麵，有豆漿送添呀！搞成場大龍鳳飛去越南仲要搭七粒鐘車、瞓喺荒山野嶺，出街得一秒，但憑佢副「姦」樣同伏喺心口隻烏蠅，真係咩戲味都出晒嚟，勁多人讚係新一代「姦角」！唔怪得幾乎每集重複又重複、重複又重複咁Loop啦！

一命二運三風水，佢嘅星途就係好似佢嘅上圍33.5咁，爭半吋就係爭半吋，冇34就係冇34；正如捉緊每個機會，但次次都好似場「秒姦」眨吓眼消失風雨中，女一？只差一點點，陰功豬！八年抗戰搏到盡，總算同自己有交代，話晒青春有限，如今釣到金龜有望做金絲雀，抵畀佢啦！況且佢真係有食力，八年都係得兩個男友，同養鸚鵡一樣長情，做佢隻鸚鵡，八月十五月圓之時，齊齊食燈籠玩月餅，再嚟個雀仔按摩，又真係幾過癮o架！

Nuts哥