洛兒為做美女學徒停捽碟跌40萬！
無綫節目《美女廚房》集合多位「美女學徒」，當中人氣最強勁、DJ出身的洛兒更是禾稈冚珍珠，在內地DJ界享負成名為五大DJ之一，為入娛樂圈博一鋪，甘願停「J」三個月，40萬酬金推落海！
再度回歸的《美女廚房》最為吸睛的是，至索兼有話題的「美女學徒」陣容，當中被主持人林盛斌盛讚夠正、夠索、與王卓淇及伍樂怡合力炮製「橙皮雪條雞扒」俘虜網友歡心的洛兒，並非只因34C身材有睇頭而受網民歡迎，其實她在電音DJ界來頭不小，曾在「Top 10 Asia's Hottest Female DJs of 2017-2018」排名第七，其在內地DJ排行榜則排第五。捽碟捽了三年的洛兒，身價不菲，據知在香港女DJ來說，身價算是最高，以每次打碟維持一小時至九十分鐘來計，加上活動性質及舉行地點，收費六萬至十萬港元。洛兒為拍《美》而暫停打碟達三個月，以每月接兩場來計，估計合共最少損失40萬收入！
怕醜唔敢選港姐
日前洛兒接受本報專訪時，對於在DJ界的身價不菲，她謙虛地未有正面談及酬勞，但卻自爆曾在一個月內要密密飛，到不同國家打碟：「幾錢一場我唔方便講，但我哋多數飛外國，一場接一場飛唔同國家，試過飛完英國，之後飛去澳洲接住落。不過都OK，可以順便旅行都開心。」
至於人紅是非多，早前更有網友質疑她整容，面對外間壓力及批評，她笑言：「壓力都OK，因為本身做DJ有班粉絲認識我，依家只係多咗另一班粉絲。屋企人亦支持我嘅工作，叫我加油努力。而我真係熱愛幕前工作，所以轉型做學徒。（你嘅必殺技係咩？）強項係傻笑，可能觀眾鍾意傻更更，我會笑多啲。（點解唔選港姐？）因為我以前好怕醜，又少嘢講。」
場地：奈良上釜