嘉玲唔畀面踩偉仔冇戲
劉嘉玲再踏台板緊張到失眠，身為舞台劇劇后的她表示演每個角色都有壓力，問到老公梁朝偉可有幫她入戲，嘉玲笑言：「佢讀對白冇戲o架！」又指偉仔從她身上感染到舞台劇的樂趣，不排除在舞台上合作。
昨日女星劉嘉玲、謝君豪、秦沛與導演毛俊輝、監製梁李少霞，為英皇舞台劇《奪命証人》綵排，並宣布加開5場，合共演出15場。問嘉玲對加場是否感開心？她坦言仍在投入角色，因要為三個角色做出層次感，仍有點混亂，正努力學身體語言，又向形體老師學習，在家中亦不時上演「分身術」，壓力大到失眠。
想睇謝君豪鬥戲
問到老公梁朝偉有否陪對戲？嘉玲說：「我唔想勞煩佢，佢就咁讀冇戲o架！（偉仔有冇興趣演舞台劇？）佢都有興趣，仲話綵排嚟探班，我話未排晒好亂，但佢想每個階段都睇睇。（偉仔演你陪佢演？）我想睇佢同謝君豪鬥戲，但唔排除會同佢演。」前日（27日）是偉仔生日，嘉玲表示只是與家人食餐飯慶祝：「我送咗蛋糕畀佢，佢豎晒手指公話好。（開口讚你？）佢唔會講出嚟。」
嘉玲為偉仔暫代經理人，被問到是否電話接個不停？她說：「好多人打嚟應徵，幫佢篩選緊。」而秦沛提到嘉玲因緊張而失眠，他笑言：「啲前輩扮緊張，等我呢個老牌新人心裏面舒服，好假o架！」而舞台經驗豐富的君豪，自爆向秦沛偷師：「Paul哥（秦沛 ）叫我睇住佢，我咪一直望住佢囉，順便偷師呀！」
