湯鎮業孖仔打戲真做
湯鎮業一對孖仔湯君慈與湯君耀最近強攻電影界，處男作就與「宇宙最強」甄子丹合作拍戲。兩人在戲中為求逼真，兄弟大打出手，由假打變成真打交！
湯君慈（Bruce）與弟弟湯君耀（Chris）去年簽約成為甄子丹公司旗下藝人，兩人更拍住子丹合作電影《大師兄》，有星二代的光環與宇宙最強的加持，加上帥氣外表，極有潛力成為新一代人氣小鮮肉。
為打籃球爭執
新戲中，孖仔飾演問題學生，子丹做熱血教師。講到難忘場口，Chris大爆兄弟倆弄假成真、大打出手：「有一幕講我哋打交，拍完後導演覺得打得唔真，後來再拍，打打吓變咗真打，初時導演唔知我哋發生咩事，睇得好入神，慢慢先知原來真係打緊交，就過嚟阻止，又叫我哋冷靜啲。」他坦言自從中四後，兩兄弟就沒有動真格打交，但之前試過打到入醫院，今次為電影而破戒：「當年因為打籃球而發生爭執，後來變成打交，哥哥一拳打落我個鼻，打到歪咗，即時Call白車入醫院，之後就再冇打交喇。」
提到與子丹合作，兩人揚言獲益良多，Bruce坦言子丹要求高和認真，有對方在場壓力特別大：「佢喺片場經常咖啡不離手，做嘢從來唔會玩電話，佢經常叫我哋要認真啲，態度好重要。」兩人最近學泰拳及武打動作，以求親身上陣應付動作場面。
父子變仇人
Bruce早前還父子檔上陣拍攝內地網絡電影，但父子倆在片中是仇人，他笑言：「佢係我殺父仇人，最後我要殺咗佢，呢個幾好笑，亦都幾高難度。爸爸喺片場好似變咗另一個人咁，因為佢好入戲，眼神又凌厲，把聲仲特登低音幾度。」他指將來再合作，希望可以做回父子，因為比較易投入。
孖仔外表相似，又簽同一間公司，問到會否擔心局限發展？Bruce不太認同：「我哋都唔係咁似樣，而公司會將我哋塑造到唔一樣。我哋可以演失散多年嘅兄弟，我做警察，佢做壞人，好似《無間道》咁。」
場地：SPORTAGON FAC
服裝：Adidas
化妝：Nicole Poon阿歷
髮型：Perry Yung@PP IL Colpo