柏豪爆超蓮多仔埋身
歌手周柏豪昨日孖住何家千金何超蓮出席化妝品牌活動，柏豪被主持人問到現實生活中不為人知的一面，他自爆：「雖然平時係宅男，但有時都好大男人，尤其係做重要決定嘅時候，我會好主觀咁爭住話事。」
講到早前兩人為女士化妝品拍廣告，柏豪表示開心獲邀，更乘機幫超蓮開設的食店宣傳：「我特別欣賞啲識做生意嘅女仔，之前去超蓮舖頭幫襯，啲嘢好好食，招呼仲好好，大小姐親自拎碗麵畀我。」問到有否介紹男仔給超蓮？柏豪即大爆：「佢身邊大把啦，之前生日會我見到有好多男性朋友，我諗佢煩點揀多過煩冇拖拍。」超蓮被問到被細佬何猷啟爬頭結婚，她說：「都冇話爬唔爬頭，始終男女唔同，依家都唔心急拍拖嘅。」
