張頴康被老婆誤會去滾
藝人張頴康患有銀屑病逾十年，昨日他在社交網自揭病況，他受訪時透露最近接受生物製劑治療，病情得以受控，並感謝太太麥雅緻陪他對抗病魔，笑言太太最初不了解其病情，竟誤以為他「去滾」所致，令他哭笑不得！
張頴康昨日上載一張穿着背心短褲的自拍照，並自爆患銀屑病（俗稱牛皮癬）的過程，此病除了皮膚會出現紅疹及甩皮屑，關節亦會腫脹。他寫到患病的苦況時，指以前為掩蓋身上的紅印，要穿長袖衫褲到健身室，現時因病情已受控，可以穿短衫短褲出街以及到海灘游水，毋須理會他人目光，又鼓勵其他銀屑病患者不要放棄治療。
打生物製劑曬太陽
昨日他接受電話訪問時透露，自2006年加入無綫後便發現患上該病：「當時拍緊劇集《王老虎搶親》，關節腫到要入醫院，當時檢查咗幾日都唔知咩事，後來先知係銀屑病，要靠類固醇同曬太陽治療。」去年張頴康出埠拍攝劇集《天命》時病情更開始惡化，他說：「要出埠拍劇心情唔係咁好，又有壓力，所以就飲酒紓壓，令病情復發兼嚴重咗，我返到香港就醫，打咗生物製劑同戒酒，兩三個星期就控制到病情，花費唔平，頭一個月就用咗5萬蚊，因為第一次劑量比較重。」他指病情已得到控制，以前怕被人問東問西，現在則不用遮遮掩掩曬太陽！
不會傳染但可遺傳
問到太太麥雅緻如何支持他，他笑說：「最初佢都唔知我乜事，仲問我係咪因為滾先搞成咁﹖我話梗係唔係啦，佢有上網搵方法幫我一齊對抗病魔。呢個病係冇傳染性，但有遺傳性，我嘅爸爸同爺爺都好似有，而且係傳仔多過傳女，所以當我得知第二胎係仔嘅時候都有擔心過，希望佢冇事啦！」