劉雅麗再現《芳華》壓力大爆眼瘡

劉雅麗和譚偉權綵排時十分認真，完全投入兩位巨星的情緒。

舞台劇將於7月4日起假新光戲院舉行，當中劉、譚二人演繹兩位巨星的友情關係，以及在圈中所承受的壓力，並唱出接近50首梅艷芳和張國榮的經典歌曲，至於演經理人角色的林澤群，都會唱其偶像譚詠麟的歌。綵排當日，劉雅麗為要保護爆瘡的眼睛，只好不化妝戴上黑眼鏡，排練時一絲不苟，阿梅上身般與譚偉權載歌載舞，二人默契十足，因他們對兩位巨星均十分敬愛，不敢怠慢。

焗住台下換衫

今次演出的戲服近20套，歌衫投資亦達六位數字，劉雅麗和譚偉權稱換衫環節才是他倆最擔心的：「搶裝係最辛苦，我哋每人都有八、九套衫要換，又有假髮，要一分鐘內換裝係好大壓力，所以事前我哋打好晒底，到時就喺台下換，呼籲大家唔好嚟𥄫嘢！（阿梅啲衫性感要如何準備？）我就冇梅姐咁性感，係得咁多（指自己胸口）！」

壓力感同身受

二人日練夜練兩位前輩的故事和歌曲，晚上可有夢見前輩？劉雅麗說：「咁又冇咁靈異！由開始做呢個戲到依家，我哋都冇試過夢見過哥哥或者梅姐，我哋只從資料上得知佢哋嘅嘢。演繹佢哋面對嘅壓力，其實我哋作為演員都有同樣經歷，當然我哋冇佢哋咁紅，但會用同樣感受去演繹！」而譚偉權則稱：「12年前都演過哥哥嘅戲，嗰時好大壓力，綵排時都有哥哥國際歌迷會喺度睇，可能嗰次試過，識得將自己調節，今次再演好好多！」

林澤群、劉雅麗和譚偉權期望下月的演出能給觀眾驚喜。	張國榮和梅艷芳是不少樂迷的永恒巨星。	生眼瘡的劉雅麗，笑言疑是見污糟嘢所致。