同單文柔煮飯仔 陳展鵬：醉翁之意不在酒
前晚「視帝」陳展鵬與女友單文柔一同為無綫節目《美女廚房》錄影，兩人打情罵俏，相當甜蜜。展鵬亦知情識趣，自爆享受與單文柔「煮飯仔」，笑言醉翁之意不在酒，最重要是過程。
由藝員蕭正楠、林盛斌、張振朗主持的無綫節目《美女廚房》，前晚在將軍澳電視城錄影，今集嘉賓請來陳展鵬、阮兆祥與胡鴻鈞。展鵬與擔任「美女學徒」的單文柔一同受訪，對於女友烹飪手勢，他笑說：「可圈可點啦，有啲好食、有啲就唔好食，為節目要煮啲奇特菜式。（直接彈唔好食？）又好少話唔好食，會話可以啦。」問到單文柔菜式被彈會嬲嗎？她笑說：「真嘢就唔好講出嚟。」展鵬笑說：「咁即係嬲？」
自誇快狠準
閒時亦有下廚的展鵬自言煮餸快狠準：「我煮得快好多，佢煮得慢啲，當食消夜。」單文柔笑言當然是她煮得比較好吃。問到兩人可有一起「煮飯仔」？展鵬笑說：「好似有，又好似冇，唔記得。（一齊煮飯有情趣？）開心嘅，一齊諗吓煮乜、點煮，醉翁之意不在酒，最緊要係個過程，同埋依家都多數喺屋企食飯。」單文柔笑說：「女仔都鍾意煮嘢食，如果男仔都鍾意都幾開心！」此外，被租務糾紛困擾的 展鵬表示已交給律師處理，暫沒新進展。
