張敬軒關智斌合體輪椅區觀眾彈起

軒仔6場紅館騷，每晚都有不少圈中人捧場，尾場更有古巨基、洪卓立、湯怡、余安安、英皇電競總監Toyz、老闆楊受成等。由於早前第4場請來BOYZ（Kenny和Steven）做嘉賓，令觀眾為之瘋狂，故即使前晚未有嘉賓位，軒仔亦即興捉觀眾BOYZ上台「安歌」，尖叫聲震爆紅館！軒仔重提之前BOYZ現身如顯神迹，笑言：「我喺紅館見到神迹，所有傷殘位置嘅人全部企晒起身，你話係咪神迹？嘩！感謝主。」

軒仔又笑指三人40歲未夠，竟變成大家的集體回憶，並趁老闆在場，幫口為BOYZ爭取開演唱會，Kenny說：「今晚老闆喺度喎，老闆好唔好？老闆點咗頭嘞！」Steven問軒仔到時會否任嘉賓？軒仔望住Kenny說：「好，我同佢唱《眼紅館》都得！」尾場軒仔多次感動落淚，更特別選唱《預言書》悼念癌病逝世的歌迷Toby。而Toby的兄長昨晨在網上發文感謝軒仔，指他是天使化身，冇想過有人可以無私為朋友去做這些事。

毛髮堅挺刮爛絲襪

慶功宴上，軒仔表示觀眾每晚都令他感觸又感動，並期待開Part 2。提到他為配合「降兩度」不惜易服穿熱褲騷腿，造型相當啜核，軒仔笑稱：「我本人就係斯文啲嘅，而『降兩度』把口就賤啲，所以有個分身係好玩嘅。（真係剃腳毛？）晚晚都剃，咁有啲睇唔到嘅位咪唔剃囉，即係胳肋底呀！原來剃腳毛都剃咗成個鐘，換咗兩塊刀片。（咁硬？）我堅挺嘛！（太粗生？）係出得好快，鬚都好啲，腳因為想睇上嚟有光澤就着絲襪，但腳毛太粗，試過刮爛對絲襪，真係女人唔易做。」

坐輪椅區的觀眾（箭嘴示）全部企晒起身，認真神奇！	軒仔見關智斌跨過觀眾席欄杆上台，即出手相扶。	腳毛堅挺的軒仔，每晚都要剃成粒鐘兼換兩塊刀片。

Keep住關係冇「斷交」

問到是否親自找BOYZ任嘉賓？軒仔說：「係。（冇推你？）冇，但Steven真係推劇組而飛返嚟。（搵Kenny尷尬？）不嬲都唔尷尬，冇平時啲收收埋埋，邊會有今次咁爆嘅核彈吖！（咁你都編排咗十幾年喎？）咁真係有紀念意義先搵佢嘅。（點報答佢？）我哋之間唔講呢啲。（咁講乜？）講心唔講金嘛，心意嚟。」有傳兩人曾「斷交」，現再見亦是朋友？軒仔說：「其實咁耐以嚟我哋都冇減少來往，只係有時啲報道唔想愈描愈黑。（一直Keep住關係？）咁多年都係好好、好好嘅朋友，好Close嘅朋友，新聞又好、傳聞又好，有啲嘢愈講得多，愈無私顯見私，同埋啲花邊新聞，蓋過咗我哋各自嘅努力。關智斌唔會因為張敬軒而見報，而張敬軒亦都唔需要因關智斌而見報，呢個係我哋大家封口嘅原因。」

慶功宴上，軒仔慘被倒到一頭香檳。	老闆楊受成與古巨基齊齊捧場。	軒仔走近粉絲握手。

至於有歌迷持「失票」而被請離場，軒仔稱不太清楚，但就他而言，每次開騷都令他好頭痛，今次為歌迷會訂飛個人墊支超過100萬元，但每次都有人甩底，今次亦硬食了幾萬元飛債。