周秀娜十年打拚：我係一個演員

周秀娜入行十年，不算有石破天驚的起步，也走過風雨飄搖的日子，卻能憑不屈毅力與家人支持，終捱到出頭天！回望過去，她很感激不少前輩沿路扶持提攜，尤其是鄭丹瑞，他是第一個叫周秀娜不用性感演出的人，結果給陷入迷惘期的她點起引路明燈，讓她可以跟大家說，她是一個演員！

o靚模雖是成名捷徑，但能夠在演藝界立足的，可謂鳳毛麟角。

事業篇飽受白眼

周秀娜（Chrissie）2008年入行，翌年七月推出寫真集，並以性感形象殺入影壇，拍了超過四十部電影，直至憑電影《29+1》入圍金像獎「最佳女主角」，雖然最終敗給好戲之人毛舜筠，但能跟一班影后同級一戰，總算為自己過去的十年作出一個交代。

由o靚模脫穎而出，躋身準影后之列，路途殊不平坦，Chrissie於入行之初聽過不少冷言冷語，但性格堅毅的她沒退縮，反而愈戰愈強，只希望終有一日，可以理直氣壯地說，她是一個演員：「開頭好介意，但慢慢會明白，其實好多人都有呢啲經歷（受白眼），我一開始就係想做一個演員，亦盡己所能去試唔同嘅角色，大家愈覺得我冇可能做到，我就更加一定要去做。」

因鄭丹瑞走出迷惘

除靠自己爭取打拚，Chrissie亦慶幸得過不少前輩提點，令她學懂凡事專心做，便會有成果：「呢十年裏面，有信任我嘅人、導演畀機會我，令我可以不斷學習！（邊個前輩教你最多？）好多謝旦哥（鄭丹瑞），佢搵我拍《分手100次》，佢同其他人好唔同，同我講唔需要我性感，開頭以為佢講笑，但原來係真o架，我覺得佢好大膽，同埋對我好有信心，佢對我嘅信心，無疑亦畀咗我信心，其實拍戲好難介定好與唔好，有時我都會好迷惘，究竟適唔適合做戲呢？當時旦哥畀嘅信心，對我嚟講好重要，亦因為呢部戲，令彭秀慧搵我拍《29+1》。」

周秀娜努力堅持，終在影圈站穩陣腳。

沒有愛情滋潤，周秀娜仍堅守寧缺莫濫的座右銘。

愛情篇寧缺莫濫

除了初入行時曾承認有一位髮型師男友外，近年Chrissie可算是愛情絕緣體，問她是否要求太高？她說：「可能我將大部分心思放咗喺工作，冇諗嗰樣嘢（拍拖），個磁場就真係會冇，我真係睇唔到亦感受唔到有人追我。其實我嘅要求一啲都唔高，只係想要一個錫我、對我好嘅人，可能大家覺得我好難追，驚咗，唔敢行第一步，令我好似變咗生人勿近咁。」

不介意忘年戀

如果找不到適合的對象，寧願單身，她覺得兩個人相處，最緊要是心靈上的溝通：「我比較喜歡成熟啲嘅人，只要雙方溝通到，有共同嘅價值觀同諗法，好多嘢都冇問題！（如果相差卅年呢？）冇問題，但有老婆就一定唔得！（失婚？）都得，最緊要啲關係要清晰。」

周秀娜得到鄭丹瑞垂青，終可不用性感，正正經經做演員。

《29+1》令周秀娜獲得最佳女主角提名。

家庭篇避風後援

生活在香港，總難免背負壓力，屋企卻永遠都是卸下重擔的避風港。Chrissie每次提起家人總會眼紅紅：「全家人都好錫我，尤其是爸爸、媽媽，啱啱出道嘅時候，要用比較性感嘅形象令大家認識我，對佢哋嚟講，係一股無形嘅壓力，佢哋可能仲要面對一啲指指點點，但佢哋好錫我，從來冇叫我放棄，仲好支持同明白我，其實只要佢哋稍稍畀壓力我，我就唔可以做落去，就算做落去都會唔開心，但佢哋永遠都只會默默咁支持，令我好感動。」