軒仔玩大咗撩起祖兒把火

祖兒冧爆攬攬軒仔，最終卻收到荔枝做禮，唔知好嬲定好笑！

歌手張敬軒一連六場《HINSIDEOUT張敬軒演唱會》前晚在紅館開鑼，除化身女裝的「降兩度」現身夠晒驚喜外，他還邀得「好閨蜜」容祖兒、前輩胡楓及羅蘭做嘉賓，當中他與祖兒大放笑彈，祖兒唱完《笑忘書》後說：「今次畀面你先嚟，我見到『降兩度』就憎，佢簡直造成樂壇浩劫，好大威脅，叫佢以後唔好再喺我面前出現！」然後又稱軒仔為「好姊妹」，軒仔即笑說：「好兄弟唔得嘅依家！」又叫祖兒不要諗到咩就講咩。

其後軒仔率領全場向今日牛一的祖兒唱生日歌，並稱準備了禮物給她，工作人員隨即拿出一個果籃，軒仔卻只拿出一抽荔枝，再摘了兩粒給祖兒，笑說：「成個果籃你食唔晒，送荔枝畀你因為你火辣辣！」祖兒即扮嬲稱想請軒仔食蕉，又自言現時夠晒「火」！送走祖兒後，軒仔笑說：「真係委屈祖兒，明明一個天后，淨係攞兩粒荔枝就走。」而胡楓及羅蘭則上台玩棟篤笑。

現場播出已故男歌迷的片段，軒仔獻唱時喊到跪地，全場動容。	張敬軒	一身紅噹噹的軒仔，自嘲是一隻「火雞」。

• 鍾欣潼與老公睇得相當投入。

哭悼男歌迷

演出期間，軒仔在台上分享，表示過去一年經歷了幾次生離死別，其中一個是很喜歡音樂的年輕男歌迷：「佢好似十幾歲嘅我，好鼓舞亦好心痛，因為佢有末期癌症，當時我一收工就去醫院探佢，佢最後嗰陣同我一齊錄咗幾首歌，每次錄歌前佢都要打嗎啡，我之前應承會將同佢嘅合唱歌擺喺新碟，同埋帶上紅館。」說畢唱出二人的合唱版《預言書》，期間喊到聲都震埋，更一度激動到蹲低掩心口。Encore環節，軒仔多謝其中一位樂手時笑說：「成個關智斌咁樣。」全場即時歡呼。而坐在Panel位的鍾欣潼與老公賴弘國全晚睇得十分投入，更不時企起身。