蔡思貝冧馬里安奴 擇偶要夠長
藝人蔡思貝昨日孖住首度來港的巴西體操王子馬里安奴（Arthur Nory Oyakawa Mariano），出席「Fashion Walk King of Sports盛夏慶典」揭幕活動，二人玩遊戲大鬥身體柔軟度，思貝更大方分享異地戀愛史，自爆最愛男士「夠幼夠長」。
貴為「運動界人氣王」的馬里安奴有不少女粉絲，就連首次見面的蔡思貝都大讚他是陽光男孩：「覺得佢好Sharp醒，牙齒好白，好似漫畫裏面見到嘅陽光男孩。（你哋傾咗啲咩？）都係啲基本問題，問吓佢鍾唔鍾意香港，一盡地主之誼，如果佢喺度留多幾日，我都可以帶佢出去玩吓。」言談間思貝又指自己比馬里安奴年長，惟她認為愛情無分界限，不抗拒姊弟戀。
異地戀5隻手指數得晒
問到對異國男孩的印象，思貝直言因曾在外國讀書，覺得外籍男士特別有親切感，更自爆試過異地戀：「以前喺外國拍拖都係同外國人，幾多個就唔講啦！（10隻手指數唔晒？）5隻手指都數得晒啦！不過如果係異地嘅話就可能難啲維繫。」她又表示比較在意與另一半靈魂上交流，更有一項特別擇偶條件：「我好鍾意我爹哋對腳，好幼、好修長，睇男仔會以老竇隻腳為參考，如果隻腳靚會加分。」
另外，女星龔慈恩女兒林愷鈴（Ashley）現年18歲，談到她又再長高，她即耍手兼擰頭：「唔好啦，我唔想再高，我依家173cm高。（驚太高識唔到男朋友？）係有時太高覺得唔自在，如果我衝破咗個心理關口，先會好Enjoy呢個高度。」