片尾曲完勝主題曲？胡定欣唱歌菊梓喬聽到喊

菊梓喬在活動上發表感言時，不禁感觸落淚。

希望拍劇入屋

日前Hana出席歌迷會活動時，獲唱片公司CEO何哲圖及經理人頒贈《忘記我自己》的金唱片，她感觸落淚說：「啲人成日打擊我自信，話我冇可能做到歌手，但我真係好想試一次。」對於網民指其片尾曲力壓主題曲，她說：「我有聽胡定欣嗰首，我聽完都喊。（係好聽定唔好聽？）好好聽，我好想有機會同胡定欣合作，其實我聽番自己首歌都喊，因為好有畫面。」Hana希望下一步有機會拍劇，令形象更入屋，直言想演和自身性格不同的角色：「好似巴辣啲嗰種。」問可想和緋聞男友張景淳演情侶？她一副怕怕樣擰頭說：「唔好，怕尷尬。」

太子妃想放假

而在劇中飾演太子妃的胡定欣昨日到九龍灣出席活動，即場炮製惠方卷。講到Hana主唱的片尾曲獲網民大讚，問她會否擔心被搶峰頭？定欣說：「佢唱得好好呀，不過我都唱得唔錯，第一次幫自己嘅劇集唱主題曲，意義好大，好多朋友都話畀我首歌洗腦，化妝師、髮型師都識唱。」她又大呻已一年沒休息：「上次同父母去咗大阪，相隔廿年冇一齊旅行，媽咪好開心，想每年都可以同佢哋去旅行，今次想去北海道。」

胡定欣認為主題曲和片尾曲一樣好聽。

菊梓喬獲頒金唱片，開心不已。