家輝美斯點樣分 蘇亞雷斯雷莊𠒇撞哨牙

軒仔唱得又玩得，試過落足心機Cosplay扮番「原版」娛人又娛己，對於被指與同樣有深邃雙眼皮及蝦餃下巴的巴西翼鋒韋利安撞樣，他亦認同：「少少似！」尤其是眼神，不過有人覺得他更似已退役的巴西球星卡卡，又說：「唔介意，『萬能Key』都幾好，證明我個樣易畀人接受，都係大家鍾意嘅人。」今晚舉行頭場紅館演唱會的他，打算睇世盃決賽享受足球熱。

沈震軒留尼馬髮型

而周柏豪雖然自覺不似比利時中場卡拉斯高，但亦樂做「萬能Key」：「好多人話我似已故國務院總理周恩來、曼聯球星迪基亞、寵物小精靈『比比鳥』，甚至澳洲女模Paula，最緊要大家開心，笑吓啦！」至於沈震軒對於「翻版尼馬」的稱號，他笑言：「可能我個樣有少少中東、馬來西亞人嘅味道，以前黑啲嗰陣仲似呀，但未試過出街嗰陣畀人認錯，以前我亦試過留尼馬嘅髮型，好MK！」

張家輝VS美斯（阿根廷）相似度：95%

若要人似我，除非兩個我！阿根廷球王美斯跟香港金像影帝張家輝有多似不用多說，個樣似到以為同一個阿媽生。其實他們事業都好相似，美斯乜球會同個人獎項都攞過，只差世界盃冠軍加冕，長年被寸自己隊波是「亞軍廷」；至於家輝亦有個幾乎不可完成的任務，就是攞奧斯卡影帝。但家輝會比美斯容易成功，因為美斯有一班豬隊友。

張家輝（左）	徐榮（左）	吳鎮宇（右）

蘇亞雷斯（烏拉圭）VS雷莊𠒇 相似度：90%

千呼萬喚！有「咬人蘇」之稱的烏拉圭神鋒蘇亞雷斯絕對不能不提。全港市民幾乎人人都知咬人蘇跟就快卸任的港姐冠軍雷莊𠒇似樣，二人一棚哨牙永遠深深烙印港人心坎中。雷小姐之前話要離開香港勇闖荷里活，其實真係可以去搵「咬人蘇」傾傾商機，說不定殺出條血路。

周柏豪（左）	陳友（右）	張敬軒（右）

徐榮VS沙拿（埃及）相似度：80%

徐榮自己話過似好多球星，呢期他最似定必是效力利物浦的埃及神鋒沙拿。嗱嗱嗱！他們臉上鬍子分布驚奇地一樣，再加上炯炯的眼神，簡直孖生一樣。如今沙拿炙手可熱，但被皇馬茅躉後衞沙治奧拉莫斯摔跤式整傷，埃及全國祈求沙拿早日康復，徐榮可以抱埋囡囡包包出來，為沙拿哥哥打氣唷。

吳鎮宇VS奧祖亞（墨西哥） 相似度：90%

睇相就知，墨西哥龍門奧祖亞跟Sam哥吳鎮宇有幾似，似到奧祖亞穿起機師制服、鎮宇戴上龍門手套就可以直接交換工作。不過奧祖亞之前因為召妓風波搞到一身蟻，雖然唔使踢出國家隊，都搞到名譽掃地。向來不平則鳴的鎮宇一定要出聲，鬧爆奧祖亞踢世界盃要醒醒定定，洗心革面。

卡拉斯高（比利時）VS周柏豪相似度：60%

現已轉戰中超球隊大連一方的比利時中場卡拉斯高，因為生得靚仔，向來都多女Fans，尤其「比比鳥」髮型跟香港男神周柏豪一模一樣，若柏豪留埋鬚，唔使Pass都可以走入比利時更衣室。老老實實，柏豪真係可以學卡拉斯高仰望神州搵人仔，不過首先要問過老婆先，你懂的！

奧斯爾（德國）VS陳友相似度：70%

德國10號仔奧斯爾（奧燒）今屆會帶領球隊衞冕，除了球技、懶散和踢波冇氣外，奧燒最多人談論就是他跟很多人撞樣，除了法拉利的創辦人Enzo Ferrari似到十足外，也跟香港藝人陳友似得交關，尤其是一雙招牌大眼。不過奧燒揀波踢，陳友百足咁多爪事事親力親為，就是兩者致命分野。

張敬軒VS韋利安（巴西）相似度：50%

人人都知張敬軒係萬能Key，赫然發現，軒仔跟巴西翼鋒韋利安都好似，深邃的雙眼皮同蝦餃下巴都係他們的標記，不同的只是膚色和南轅北轍的髮型。如今巴西成為世界盃冠軍大熱，軒仔咁鍾意扮嘢，不妨整件巴西球衣、塗黑膚色、炸爆個頭，相信可以吸到好多Like！

沈震軒VS尼馬（巴西）相似度：60%

巴西代有球王出，今屆世界盃森巴兵團繼續有尼馬領軍。早前沈震軒無厘頭話自己天生混血兒樣，似足尼馬咁話。雖然佢唔怕畀人笑，但依家同尼馬一樣留了鬚，加上亂糟糟的髮型，又幾似孖兄弟。不過奉勸沈震軒切勿似尼馬般寸寸貢，隨時畀人踢跛腳！