陳展鵬晒證據反擊 阿媽仆到腦震盪
陳展鵬去年在將軍澳租住一個單位，惟業主指他提早退租，並欠最後一個月租金，收樓時又發現地板發霉變黑。昨日展鵬持有力證據逐一反擊，表示之前主動叫業主整地板，但對方遲遲未理，令其母因此絆倒撞到腦震盪，嚴重至送入深切治療部。
無綫視帝陳展鵬之前在將軍澳以三萬元月租一個八百多呎單位，最近遭「蒙面業主」指他沒依合約提早搬走，收樓時發現地板發霉，冷氣機位有螺絲等。展鵬昨日受訪時，提供證據逐點反擊：「第一，其實幾個月前係我發現地板有問題，主動Send條片畀業主，當時已經撬起晒好危險，希望佢整番，但佢一直拖，冇搵人處理。」
他更透露其母因地板問題在家中發生意外，撞親頭要入深切治療部，當時他要出埠工作，媽咪又處理不到事件，故才交由助手處理，絕對不是「冇影」。
短訊協議提早退租
展鵬亦公開與業主的短訊記錄，對於提早退租，短訊中亦看到業主與展鵬的助手協議好，對方亦留言「你喜歡啦」及「同意你搬離，請確實時間」等。
展鵬昨日在電視城拍劇時見記者，問到有否如對方所說破壞地板及以白紙鋪在上面，他無奈表示單位問題多多，又狂跳Fuse，業主話有問題就找他，但最後冇理過，展鵬說：「我真係成日唔喺香港，要交畀助手搞，專業人士都睇到，啲地板已變緊灰，都冇蠟喺度，全部片係我發畀佢，佢都冇處理，啲紙同布唔係專登要遮，係啲地板撬起晒，全部爛晒，我要搬屋嘛！交吉要影相，啲相係我影畀佢o架！」
病得嚴重籲勿追訪
他續說：「佢話要嚟收鎖匙，我媽咪行又行唔到，要坐輪椅，講嘢又講唔到，我又唔喺香港，點搞？咪叫助手擺條鎖匙喺管理處，一時接洽唔到。我唔係做到最好，但如果有問題，佢可以報警、去索償，依足手續咪得！大家WhatsApp度Settle咗，唔知點解咁樣！你要攞番一個月租，搞掂所有嘢咪OK囉！用法律途徑最好，咁耐以嚟，我陳展鵬唔鍾意解釋，但點解今次我要逐一講。我都希望某啲雜誌同報紙，你哋唔好採訪我媽咪，佢依家個病係好嚴重，你哋可以去律敦治醫院、法國醫院Check吓乜嘢事，佢一畀閃燈閃到就好大件事。」
問業主有否提出賠償？展鵬說：「冇所謂，我哋之前傾過，我哋知上期唔可以當租金，傾完後佢係同意咗，件事處理咗，但唔知點解今日會有呢啲報道，我只希望盡快搞妥件事，我都搵咗律師處理。」