湯告魯斯晒新型戰機 美國空軍海軍抽水互片

靚佬湯32年前憑《壯志凌雲》的靚仔海軍戰鬥機機師造型，成為萬人迷，續集《Top Gun：Maverick》經過重重波折終於開拍。他於Instagram上載第一日開工的照片，雖然未見他凍齡的正面照片，但就穿上機師軍服背對鏡頭，背景是原作戰鬥機「F-14」的升級版，並引用經典對白宣傳：「FEEL THE NEED.」

「從來唔知咩叫第二」

宣傳片引來美國空軍與海軍借機抽水，互相嘲諷。美國空軍於Twitter引用靚佬湯新相，指海軍戰機不及空軍戰機犀利：「如果Maverick（靚佬湯戲中角色）真係追求速度，可以跳上我哋其中一架F-15E Strike Eagles，最高時速有1,875英里。」海軍亦在Twitter反擊，引用原作對白指空軍比他們遜色：「記住喇細路，排第二冇分攞！」空軍再還拖：「F-15E從來唔知咩叫第二，你睇吓個往績啦！」火藥味勁燶！

妮歌宮外孕大創傷

另外，靚佬湯前妻女星妮歌潔曼（Nicole Kidman）最近接受訪問時，再談與靚佬湯婚姻期間宮外孕與小產的痛苦：「我哋好早就失去咗個小朋友（宮外孕），真係好大創傷！當時我哋就領養伊莎貝拉（Isabella）。」她指母親有一位領養的姐姐，所以預感自己亦有可能領養兒童：「我只係冇諗過咁早發生，但真係發生咗。」她與靚佬湯兩年後再領養兒子康納（Connor），但最終還是離婚收場。