余香凝廖子妤醉街閨蜜咬出笑淚

難忘時刻

Jennifer及Fish經歷多個難忘時刻，令感情日益昇華！兩人都試過喊住找對方傾心事，Jennifer說：「有次我好唔開心，想食甜嘢搵人傾偈，於是買咗蛋糕同酒上Fish屋企，仲拍片唱埋生日歌，但其實當日冇人生日，Fish好有義氣，隨時陪我做瘋狂事。」到去年Jennifer發生交通意外撞爆鼻，Fish當時收到Jennifer以短訊傳來血面相片，心痛得與男友趕到醫院探望，兩人更在醫院大堂相擁而哭，Fish說：「好擔心佢會死、會破相，個樣咁靚爆咗鼻喎！（望住Jennifer）我爭啲冇咗你呀！」

講到最近的搞笑事，Jennifer指着手臂的牙印，大爆是Fish發酒癲的痕迹：「之前慶祝彭秀慧拎新導演同埋五月生日之星，Fish飲醉咗咬我手臂，第日發現瘀晒！聽番原來我都有咬佢，但細力好多！」

最佳樹窿

二人屬於同一模特兒公司，七年前首次「邂逅」已留下特別印象，Jennifer笑說：「記得當時係影一個長腿專題，我成隻豬咁，又有Baby Fat，唔夠Fish對腳又白又長！」Fish則說：「唔係喎！我覺Jennifer好靚，長頭髮。」由馬來西亞來港發展的Fish在港朋友不多，早已視Jennifer為好友，到前年合作電影更成為無所不談的閨蜜，Fish笑說：「依家最深入嘅秘密都會同佢講，例如去廁所未呀！感情生活當然都會分享。（講男友壞話？）呢啲係基本！雖然我哋都感情穩定，但每日可能有新問題產生，會成日傾對感情嘅睇法。」Jennifer表示Fish成為她最信任的樹窿，全因她夠同理心：「我同其他人講嘢，對方可能會批評你先，但Fish會明白我嘅處境，再細心分析。」

Friend到互餵食物，太冤氣吧！	可憐的余香凝，成為了廖子妤的發洩對象。	廖子妤（左）、余香凝（右）

互讚優點

Jennifer及Fish因了解而Friend爆，激讚對方優點多多，Fish讚Jennifer皮膚好及做事有條理，最羨慕對方的高EQ，Fish說：「我會突然爆炸，未必係因為眼前嘅事，可能係鬱埋好多日嘅嘢，相反Jennifer永遠控制得好好，冇脾氣咁。」不過，Jennifer卻認為Fish的「爆」是一種優點，自己的穩定反而不好：「Fish幅度好大，有時好好有時唔好，但總會有突破嘅時候，同埋佢好感性，睇戲喊得好勁，因為佢好易受觸動，佢覺得我『穩陣』，可能係冇佢每樣嘢都感受咁多。」她又讚Fish聰明及擅於寫故事，有機會是下一個張艾嘉，Fish說：「我想將來有機會我做導演佢做演員，我想發掘佢更多層次，例如想佢演有心計、少少奸嘅角色。」

二人互數缺點，一發不可收拾。	廖子妤大情大性，睇唔過眼就會隨時大爆發。	二人秤不離砣，一同出席金像獎頒獎禮。

難頂缺點

到數對方缺點，起初Fish表示Jennifer沒甚麼可批評，但之後講到停不到口，相當搞笑！Fish說：「講起就嬲，佢成日話冇所謂，又唔係真係冇所謂喎！有時只係驚人哋唔鍾意，但有時又真係冇所謂喎！佢人好得滯，但如果影響到自己，就應該要堅持吓！」至於Jennifer則指Fish節奏太慢，有時即使預早三小時起身，到最後都遲到，因太易分心，化妝時可能會突然做了其他事。

後記：

Fish及Jennifer曾拍戲演好姊妹，問下次想演甚麼？Jennifer笑言想跟Fish做敵人，但擔心打戲不夠對方狠，此時Fish說：「唔好呀！我好易入戲，真係會憎你o架！（你哋有冇試過鬧交？）唔會，我太怕冇咗佢。」兩人忍不住對望微笑，深厚友情盡在不言中。

余香凝化妝：Jennifer Chan＠Annie G Chan Makeup Centre

髮型：Ken Hui＠ii ALCHEMY hair & nail

廖子妤髮型：Ziv＠private i

場地：Nexus Bar & Restaurant（Barry@relaxdearhk）