袁詠儀睇波撐偶像「排」隊集郵
影后袁詠儀（靚靚）求學時曾是田徑隊代表，近日「FIVB女排國家聯賽」香港站賽事假紅館舉行，隨即勾起她隱藏已久的運動熱血細胞，與忙於拍戲的丈夫張智霖齊齊撐中國女排！兩人到後台探班時化身小粉絲瘋狂集郵，身高約5呎8吋的靚靚站在一眾女排代表如教練郎平及朱婷等身邊，頓變「小鳥依人」。事後，她上載合照分享，能與排球明星近距離接觸，認真「恨死隔籬」。
「專登企矮啲就我」
靚靚接受電話訪問時表示，一路都鍾意睇排球比賽：「今次朋友有份贊助賽事，仲安排我哋入場，梗係興奮啦！我仲睇足兩日，永遠支持中國隊！中國對日本打得比較輕鬆，對意大利就辛苦咗啲，但中國隊亦爭取所有機會，希望佢哋打到去江門都有傑出表現。」
靚靚又形容見到教練郎平一刻，感覺相當「震撼」﹕「由細睇佢打波睇到依家，佢打波姿勢好型，其他幾位後起之秀好似朱婷咁，前途都無可限量。（合照時變小鳥依人？）係啊！佢哋專登企矮啲就我，搞到我唔係幾好意思。」張智霖則透露剛剛拍完最後一場戲，有時間去支持：「我只去得一日咋！個個都打得好好。」
