鄧洢玲損手爛腳浸死海消毒
索女主持鄧洢玲（阿旦）飛到以色列慶生，不諳水性的她大膽走落死海暢泳，穿上性感比堅尼被讚夠「Hot」，更難忘第一晚被迫裸睡。
阿旦日前應護膚品牌邀請遠赴以色列拍攝，暢遊耶路撒冷、死海等著名景點，她說：「行程中度過生日，覺得好開心。」又走到哭牆許願，她說：「我係用中文寫願望。」阿旦指在死海沙灘，見到很多女仔着住比堅尼四圍走，但她卻說：「當地人見到我哋中國人，眼光好得意，尤其係我好細粒，喺佢哋眼中係小矮人，不過喺沙灘着住泳衣，佢哋會搞笑話我So Hot！」
行李Delay
阿旦又透露飛抵以色列時有「意外」發生：「我個人到咗，但行李就冇跟住我去，足足遲咗30個鐘頭先送到畀我。」因抵埗當晚即要參加派對，由於冇衫換，她只能着上機時所穿的裙，當晚在酒店更要裸睡：「佢哋有借落妝、護膚品畀我，但我唔可以再着住嗰條裙，因為唔鍾意污糟邋遢瞓落床，所以第一晚要裸睡。」
達成「遺願」
能夠到死海一遊最難忘，因為去死海是阿旦人生遺願清單的其中一項：「敷住海底泥浸死海係一個好難忘嘅經驗。」因為不懂游泳，平日到沙灘也不敢落水，她笑說：「原來真係會浮，我可以攞住本雜誌浮喺水面睇。」
由於死海比一般海水多10倍鹽分，故一定要着拖鞋落水，但手腳依然被鹽的結晶（界）損，她說：「不過就唔驚，因為鹽分咁高即時消毒，唔會發炎，我仲把握機會浸耐啲，因為聽佢哋講浸死海可以醫到關節炎，有啲咩痛症，都可以幫助復原。」