陳茵媺難得拍拖：玩夜啲會出事！
星級媽咪陳茵媺（Aimee）與老公陳豪（阿Mo）放下家中三個寶貝，拍拖出巡宣傳主演的電影，Aimee指已有幾個月沒機會拍拖，可惜未能玩得太夜。身為愛妻號的阿Mo直言戥太太辛苦，為老婆分擔湊仔重責的他，透露暑假要放低一家人到內地開工，直言：「人在江湖身不由己！」
陳茵媺、湯怡與導演劉偉恆等前晚到旺角出席英皇電影《某日某月》首映禮，缺席的男主角原島大地拍下片段支持，到場的嘉賓包括英皇老闆楊受成、泳兒、區瑞強、吳千語等。
趁機離家出走
以露肩裝現身的Aimee與老公陳豪拖實晒恩愛，阿Mo直言戥老婆湊仔辛苦：「好難得可以從屋企出走！」問Aimee是否很久未有二人世界？她秒答：「Yes！」並轉頭望向老公，似乎怕有投訴老公之嫌，她續說：「都有幾個月喇，難得出嚟當拍拖！（今晚玩夜啲？）咁會好大件事，妹妹每朝五點就醒，我哋就要跟住醒，幾夜都係咁早起身。」阿Mo又指將到內地開工，暑假未能與家人到外地旅行：「Aimee會帶佢哋返加拿大。（幾日時間都冇？）我都想呀！（明年爭取機會？）人在江湖身不由己呀！」
湯怡唔攬洪卓立喊
同場的湯怡表示已睇過新片四次：「前一晚都有優先場，我已經唔敢睇，好怕今晚出活動眼腫腫！」問男友洪卓立會否到場支持？湯怡未有正面回應：「公司個個都會嚟睇。（攬男友喊？）我同導演坐，攬佢喊先！」最終洪卓立在活動開始前現身，更透過助手婉拒與女友合照。而泳兒亦直言眼淺，自爆睇卡通片都會喊，問是否經常與男友睇戲？她笑說：「佢唔會陪我睇卡通，通常一齊睇笑片多。（睇愛情動作片？）屋企自己睇啦！」
