李美慧後日結婚老公任人玩
即將下嫁富商曾文豪的落選港姐李美慧，昨日相約「姊妹團」到酒店開會商討後日婚禮的細節，早前默認有喜的美慧肚凸凸現身，提到玩新郎環節，她笑言不會錫住「老公」！姊妹團更開大口索價，曾文豪預兩億作開門利是。
現年31歲的2006年落選港姐李美慧（原名李斯庭），在無綫熱播劇《宮心計2深宮計》中飾演太平公主陳煒的近身侍婢，演技獲不少網民讚賞。快將成為人妻的她，將於後日（3日）於淺水灣與56歲富商曾文豪（Peter）舉行婚禮。
Peter照顧凸肚新娘
連日忙於籌備婚禮的美慧，昨日中午孖住未婚夫Peter相約陸詩韻、楊埕、郭千瑜和梁麗瑩等姊妹團在尖沙咀一間酒店開會，一行人逗留兩個多小時離開，甫見記者拍照，美慧叫埋一眾姊妹及未婚夫大方企定定拍照，Peter更搭住未婚妻膊頭甜笑晒恩愛。早前默認有喜的美慧，腹部微隆，但手腳依然纖幼，問她現時心情會否緊張？她說：「一班姊妹仲緊張過我。」其後一對準新人上車，Peter更體貼地為未婚妻開車門，盡顯紳士風度。
Wasabi脫毛蠟侍候
提到玩新郎環節，曾文豪表示開綠燈任玩唔嬲，問到美慧可會錫住未婚夫？她透過短訊回覆：「唔會喎！佢有份開會，知道玩啲乜，核突嘅又唔驚，總之佢唔驚就得啦！」她指開門利是亦會任姊妹團開價：「開門利是不嬲都係要好意頭，佢哋開價兩億，但咩幣就唔知，Peter依家搵緊兩億嘅咩幣係最抵……」
楊埕接受記者訪問時表示，其表姐和李美慧是好友，大家經常去旅行、玩到癲，她說：「初時我以為Peter好斯文，點知佢叫我哋唔使留手玩盡啲，所以結婚當日我哋會用盡所有嘅精力！玩新郎其中一招，會買Wasabi畀佢哋刷牙，愈平愈辣，會買廿蚊以下嗰啲！另一招係買啲脫毛蠟紙搣腳毛！」