林子善蜜月前夕爆溝女情慾短訊

藝人林子善今年4月豪花百萬補擺婚宴迎娶拍拖5年的女友Kary（董佩欣），昨日卻有傳林子善婚前曾與Kary短暫分手，並於這段真空期Send肉麻短訊和錄音力追女藝人L小姐，拍拖後他即帶新歡現身朋友聚會。但據知二人拍拖只個多月，子善有感大家性格不合，加上好友唐詩詠當時勸告他要珍惜Kary，最終他亦與Kary重修舊好。

自認成日亂噏

昨日流出的情慾短訊和錄音，不乏「避孕套」和「床有味」等字眼，甚為露骨。對於有關傳聞，子善回應說：「個女仔喺我同老婆分開期間出現，但只係一齊咗好短時間，過咗一段時間我就搵番我老婆。可以100%話畀大家知，唔係第三者嚟嘅，佢絕對冇咁嘅能力變成第三者。至於嗰啲情慾短訊，識我嘅人都知我成日亂噏，根本嗰句係電影對白嚟，係有出現過呢啲嘢，但唔啱咪趁早去解決，好過拖泥帶水。你話對方機心係咩？我唔清楚，但唔會公開個女仔嘅身份，因為唔想傷害到佢，佢始終都未嫁人，喺我角度做唔到情侶，都唔使做仇人，男女之間感情事唔使搞到咁複雜！」他自言頂天立地，亦獲老婆信任，直言婚姻關係堅固，不會因這種小事出現問題。他亦在社交網交代此事，強調沒有影響兩公婆的心情。

至於Kary亦在社交網分享夫婦煙韌合照撐夫：「有我喺度Support you唔使擔心，雖然你成日亂噏，但好在一向互相坦白！唔會因為咁小嘅事影響到我哋，畢竟已經兩年前嘅事，亦希望佢都早啲放低！」Kary受訪回應時語氣溫和地說：「多謝大家關心！我同子善都好好，唔會因為呢件事影響到我哋感情嘅，其實一早已經知呢件事，所以外間唔需要有太多嘅猜測。」

曾與林莉嫻傳緋聞

據知，林子善與L小姐於兩年半前在朋友圈認識，目前女方已移居外地生活。翻查兩年半前，林子善曾與同門藝人林莉嫻合演電影《鴨王2》並傳緋聞，昨日王晶公司的經理人表示林莉嫻因未能承受藝人壓力，去年已解約。而林子善則電話回覆否認L小姐是林莉嫻，並強調與L小姐拍拖時，對方已非圈中人，並叫大家不要再估下去。另亦有指林子善曾與歌手黃思迦拍過拖。