朱潔儀廁所現「瀑布」
前港姐朱潔儀（Donna）昨日穿露膊裙出席活動，透露因樓上鄰居裝修，令她家中的水渠爆裂：「我一向當啲衫係寶，突然爆渠，客廁出現咗個小型瀑布，好彩衣帽間啲衣物冇整濕，我先放心晒，不幸中之大幸！」她續稱因鄰居裝修而睡得不好，駕車時發生小意外：「有架車撞到我車尾，對方都好好，賠咗8,000蚊畀我，之後我去咗相熟車房，只需5,000蚊，咁我就畀番3,000蚊佢，佢非常開心。咁我覺得佢都係為咗生計，希望佢下次唔好咁唔小心。」
琦琦唔搵阿女做生招牌
同場的名模琦琦表示，未有打算邀請女兒出任其品牌的御用模特兒：「佢太細個，雖然有條件，但畀多幾年時間佢，要睇吓佢自己鍾唔鍾意。（嚟緊點樣慶祝父親節？）囡囡好耐冇見過Daddy，等老公返嚟先慢慢諗。」
