朱晨麗迷失東京Fans扲荷包做導遊
藝人朱晨麗早前到東京為新劇拍外景，首次去當地的她是路癡，幸得兩位粉絲自掏腰包「救駕」，做盲公竹帶她四處玩樂！
朱晨麗本月初到東京為無綫新劇《多功能老婆》開工，拍攝與楊千嬅的文戲部分。從未踏足當地的朱朱出發前已很興奮，其後知道四日工作行程中，每日只需拍攝幾小時，已準備好銀彈四出購物，可惜人生路不熟，加上是路癡，雖然膽粗粗想向「日本通」千嬅求救，但對方戲份頗多，故一直找不到機會「求救」！
由朝行到晚腳軟
正當絕望之際，竟有兩位粉絲專程從香港飛到當地「救駕」，令朱朱非常驚喜！他們趁朱朱有空檔，帶她四圍玩樂，朱朱說：「佢哋真係好勁，唔止自己畀錢嚟，仲帶我搭JR去主題樂園、東京鐵塔、食好好味嘅Pancake、仲有行地下街，兩日時間去咗原宿、新宿、涉谷、池袋等，加埋行咗成4萬步，由朝早11點行到凌晨兩點，真係腳都跛！但係好開心同滿足，好多謝粉絲做我盲公竹，冇佢哋都唔識搭JR，見到咁多顏色嘅線，頭都暈呀！」
同千嬅「波來波往」
談到首次與影后千嬅合作，朱朱笑言從小就聽對方的歌，當初得悉劇中演閨蜜後，已幻想過開工的情景，而圍讀劇本時首次見面，千嬅已零架子，她說：「今次好似畀機會我同偶像示愛咁，有少少緊張。真正演對手戲時，佢轉數真係好快，記得有場拍我哋吹水戲份，原本兩分鐘，但大家『波來波往』就拍咗成五分鐘，因為太多嘢講喇！」
