張振朗食到屙洪永城險窒息

無綫經典節目《美女廚房》主持蕭正楠、張振朗昨日率領18位美女學徒出席宣傳活動，一眾美女學徒中有藝人亦有索爆素人，齊齊穿上超短裙晒腿示人，相當吸睛。

蕭正楠與張振朗透露日前開拍了首集，不過張振朗拍完第二日即肚屙，他笑說：「原來真係會屙o架 ！嗰日有兩三道菜，有蝦有蟹，第二日就屙咗兩次，都未屙到脫水嘅！」蕭正楠笑言自己一日屙兩次，故沒有特別感覺。問到二人會否為節目增磅，以防屙到變瘦？他倆齊齊笑指：「好似都要喇！」目前暫未知道要錄多少集節目，問到最怕面對甚麼食材？張振朗說：「最驚係唔熟！」

召喚翠如晒廚藝

雖然未能透露嘉賓名單，蕭正楠就爆料指首集評判是洪永城，但對方對蝦蟹敏感，當日的菜式只有蝦蟹，吃到洪永城氣管收窄、呼吸困難！蕭正楠說：「我覺得未必係啲蝦蟹令佢呼吸困難，可能佢係望住啲美女學徒係咁扯蝦，佢唔係扯其……他嘢喎！」至於可會請女友黃翠如上節目做嘉賓？他說：「未請，希望佢都嚟，我成日咁踩佢，其實佢真係唔差，要幫佢平反，我諗公司會安排！」蕭正楠又笑指如果翠如做嘉賓，他給滿分都不會有人介意。不過，黃翠如接受電話訪問時說：「叫佢唔使咁好口喇，冇用o架 ！等我練好啲廚藝先上去做嘉賓啦！」

張振朗、蕭正楠昨日率領晒美腿的18位美女學徒見傳媒。	張振朗（左）食完蝦蟹第二日即屙，蕭正楠腸胃好冇事！	洪永城錄影第一集，食完蝦蟹「扯晒蝦」！

伍樂怡煮嘢OK

美女學徒之一的伍樂怡，指自己廚藝OK，她喜歡煮中菜：「以前喺加拿大都有煮嘢食，母親節都有煮畀媽媽食，我鍾意食三餸一湯。」不過她準備在節目中煮西餐，笑言要煮中式西餐！據知，新一輯的《美女廚房》會保留傳統，展示藝人雞手鴨腳的一面，不過賽制會有所改變，評判將不會知道所吃食物由哪一位嘉賓所煮，而首集的評判將會是農夫及洪永城、第二集的評判則是黃浩然及曹永廉。

笑容甜美的陳詩欣作自我介紹。

成班美女學徒騷長腿，十分吸睛。

文：影視組